बुटवल–नारायणघाट सडक वर्षा सुरु हुनुअघि सम्पन्न गर्न मन्त्रीको निर्देशन

काठमाडौं–भौतिक पूर्वाधार तथा यातायात मन्त्री माधवप्रसाद चौलागाईंले बुटवल–नारायणघाट सडक वर्षा सुरु हुनुअघि निर्माण सम्पन्न गर्न निर्देशन दिएका छन् ।

स्तरोन्नतिको चरणमा रहेको बुटवल–नारायणघाट सडक खण्डअन्तर्गत दाउन्ने क्षेत्रको स्थलगत निरीक्षण गर्ने क्रममा उनले यस्तो निर्देशन दिएका हुन् ।

मन्त्रालयका सचिव केशवकुमार शर्मा र यातायात व्यवस्था विभागका महानिर्देशक डा. विजय जैसीसहितको टोलीले शुक्रबार उक्त खण्डको स्थलगत निरीक्षण गरेको हो ।

मन्त्री चौलागाईंले वर्षा सुरु हुनुअघि निर्माणलाई तीव्रता दिई स्तरोन्नति सम्पन्न गर्न निर्माण पक्षलाई निर्देशन दिएको मन्त्रालयले जनाएको छ । सडकको दुरावस्थाका कारण जनताले भोग्दै आएका सास्तीप्रति चिन्ता व्यक्त गर्दै उनले जतिसक्दो छिटो काम सम्पन्न गर्न आग्रह गरे ।

मन्त्री चौलागाईंले पश्चिम नेपाललाई जोड्ने यो महत्त्वपूर्ण सडक खण्डको आवागमन सहज बनाउन समयमै निर्माण पूरा गर्न आवश्यक तदारुकतामा जोड दिए । निरीक्षणका क्रममा उनले चिनियाँ ठेकेदार, कोरियन कन्सल्ट्यान्ट, साइट म्यानेजर तथा इन्जिनियरहरूसँग छलफल गर्दै आवश्यक सहजीकरण र प्रगति अनुगमनलाई प्रभावकारी बनाइने बताए ।

हाल उक्त सडक खण्डको ८० प्रतिशतभन्दा बढी निर्माण सम्पन्न भइसकेको र बाँकी काम छिट्टै पूरा गरिने निर्माण कम्पनीले जानकारी दिइएको थियो ।