३ लाख ४० हजार रुपैयाँसम्मले महंगो भयो महिन्द्रा स्कर्पियो, पिकअपमा २ लाख ६५ हजारसम्म वृद्धि

नेपाली बजारमा सर्बाधिक माग हुँदै आइरहेको महिन्द्रा स्कर्पियो ३ लाख ४० हजार रुपैयाँसम्मले महंगो भएको छ । महिन्द्रा प्यासेन्जर कारको नेपालका लागि आधिकारिक वितरक अग्नी इन्पर्कोरेटेड प्रालिले आज सार्बजनिक गरेको नयाँ मूल्य सूचीअनुसार स्कर्पियोको एउटै मोडलमा यति धेरै रकम वृद्धि भएको हो ।

बजारमा अहिले स्कर्पियो ७,८ र ९ सिट अप्सनमा एस५ तथा ७ र ८ सिट अप्सनमा एस११ गरी कुल दुई ट्रिममा उपलब्ध रहँदै आएको छ । जसमध्ये एस५ टु ह्विल ड्राइभको नयाँ मूल्य ५३ लाख ९५ हजार रुपैयाँ उल्लेख गरिएको छ । यसअघि यो एसयुभीको मूल्य ५२ लाख ७५ हजार रुपैयाँ निर्धारण गरिएको थियो । यो भेरियन्टमा १ लाख २० हजार रुपैयाँ बढेका छ । एस५ कै फोर ह्विल ड्राइभको नयाँ मूल्य ५८ लाख ५० हजार रुपैयाँ तोकिएको छ । यसअघि यो भेरियन्टको मूल्य ५५ लाख ६५ हजार रुपैयाँ निर्धारण गरिएकोमा २ लाख ८५ हजार रुपैयाँ वृद्धि भएको छ ।

यसैगरी एस११ टु ह्विल ड्राइभको नयाँ मूल्य ६८ लाख १५ हजार रुपैयाँ तोकिएको छ । यसअघि ६६ लाख ७० हजार रुपैयाँमा विक्री हुँदै आइरहेको यो भेरियन्टमा २ लाख ५५ हजार रुपैयाँ बृद्धि भएको हो । सबैभन्दा बढी एस११ फोर ह्विल ड्राइभमा बृद्धि गरिएको छ । यसअघि ७० लाख २५ हजार रुपैयाँमा बिक्री हुँदै आइरहेको यो भेरियन्टमा ३ लाख ४० हजार रुपैयाँ बढेर ७३ लाख ६५ हजार रुपैयाँ पुगेको छ ।

यो एसयूभी वाहेक वोलेरो पिकअप र स्कर्पियोकै पिकअपमा समेत मूल्य बृद्धि गरिएको छ । जसअनुसार वोलेरो म्याक्सि ट्रक प्लस टु ह्विल ड्राइभ, क्याम्पर एससी फोर ह्विल ड्राइभ, क्याम्पर डिसी टु ह्विल ड्राइभ र क्याम्पर डिसी फोर ह्विल ड्राइभमा ७० हजार रुपैयाँका दरले वढेको छ । जसअनुसार यी पिकअपको नयाँ मूल्य क्रमश १९ लाख ७५ हजार, २५ लाख ७० हजार, २८ लाख ७० हजार र ३१ लाख २० हजार रुपैयाँ निर्धारण गरिएको छ ।

यसैगरी स्कर्पियोकै डवल क्याव पिकअपको ३ वटा भेरियन्टमा समेत मूल्य बृद्धि गरिएको छ । स्कर्पियोको एस६ टु ह्विल र फोर ह्विल ड्राइभ तथा एस१० फोर ह्विल ड्राइभमा क्रमश २ लाख ५० हजार, २ लाख ६५ हजार र १ लाख ७० हजार बढाएर ४३ लाख, ४६ लाख ७५ हजार र ४९ लाख ५० हजार रुपैँया पुर्याइएको छ ।