एलआरआर मोटर्सका बिजनेस हेड श्रेष्ठको भनाइ – ईभी किन्दा ब्रान्डमा विशेष ध्यान दिनु आवश्यक छ

चिनियाँ अटो निर्माता कम्पनी जिलीले उत्पादन गरेको विद्युतीय कार ईएक्स५ नेपाली बजारमा बिक्री हुँदै आएको छ । गत भदौमा सम्पन्न नाडा अटो शोमार्फत लन्च गरिएको यस एसयूभीले अहिले बजारमा निकै राम्रो चर्चा पाइरहेको छ । एलआरआर मोटर्स आधिकारिक बिक्रेता रहेको ईएक्स५ को बजार अवस्था, नेपालमा जिलीको रणनीति र बिक्रीपछिको सेवा लगायत विविध विषयमा कम्पनीका बिजनेस हेड अधिर कुमार श्रेष्ठसँग गरिएको कुराकानी :

जिली ईक्स५ मा ग्राहकको प्रतिक्रिया कस्तो पाउनु भएको छ ?
हामीले नेपालको सबैभन्दा ठूलो अटो एक्सपो ‘नाडा अटो शो २०२५’ मार्फत जिलीलाई लन्च गर्ने अवसर पाएका थियौँ । नेपाली बजारमा विगत लामो सयमदेखि प्रतीक्षा गरिँदै आएको यस ब्रान्डको ईएक्स५ ले अटो शोमा धेरैलाई आकर्षित गर्न सफल भयो । अटो शोमा हामीले निकै राम्रो बुकिङ समेत पायौँ र त्यसपश्चात अहिले डेलिभरी दिइरहेका छौ । यसको बिल्ट क्वालिटी, अत्याधुनिक प्रविधि र सुबिधासम्पन्न विशेषताका कारण एकपटक यो गाडीलाई नजिकबाट हेर्ने र गाडीभित्र चढेर फिल गर्ने ग्राहकहरु स्वतः आकर्षित भैहाल्छन् ।

नेपालको ईभी बजार निकै प्रतिस्पर्धात्मक बनिरहेको सन्दर्भमा जिली ब्रान्ड समेत भित्रिएको छ । यस ब्रान्डको विशेषताबारे ग्राहकलाई बुझाउन के पहल गर्नुभएको छ ?
हो, नेपालको ईभी बजार अहिले निकै प्रतिस्पर्धात्मक अवस्थामा छ । सानो बजारमा धेरै ब्रान्डको उपस्थिति हुँदा ग्राहकसमेत अन्योलमा परेका छन् । जिलीको सन्दर्भमा हामीले ग्राहकलाई यसको इतिहास, विश्व बजारमा उपस्थिति र नयाँ प्रविधि तथा विशेषताका बारेमा जानकारी दिइरहेका छौ । ब्रान्ड एन्डोर्समेन्टमा हामी निकै आक्रामक तवरले प्रस्तुत भइरहेका छौ । विश्वकै टप थ्री अटोमोबाइल ब्रान्ड भएका कारण जिलीका बारेमा जान्ने र बुझ्ने ग्राहक धेरै छन् । जसले गर्दा हामीलाई यस ब्रान्डका बारेमा बुझाउन झनै सहज बनाएको छ ।

ईभी किन्दा ग्राहकले के–कस्ता विषयमा बढी ध्यान दिनु आवश्यक छ ? जिली इएक्स५ को हकमा यसका प्रमुख विशेषताहरु के हुन् ?
ईभी किन्दा ग्राहकले तीनवटा कुरामा विशेष ध्यान दिनुपर्छ । पहिलो कुरा ब्रान्डसँगै लुक्स र डिजाइनले विशेष महत्व राख्दछ भने दोस्रोमा सेफ्टी फिचर आउँछ । त्यसपछि सबैभन्दा महत्वपूर्ण कुरा गाडीको ब्याट्री र त्यसको टेक्नोलोजीले ठूलो अर्थ राख्दछ ।

पछिल्लो समय नेपालमा ईभीको बाढीनै आएका कार ब्रान्डका विषयमा सबैभन्दा बढी ध्यान पुर्याउनुपर्ने आवश्यकता देखिएको छ । कुन ठूलो घरानाले ईभी ल्यायो भन्दा पनि त्यस ब्रान्डले अन्तर्राष्ट्रिय बजारमा कस्तो प्रभाव पारेको छ भनेर बुझ्नु आवश्यक छ । यस विषयमा हेर्दा जिली विश्वको टप थ्री ब्रान्डमा पर्छ । लुक्स र डिजाइनमा उत्कृष्टताको अवार्ड समेत पाएको र लेटेष्ट ईभी टेक्नोलोजीमा बनेको कारण जिली ईएक्स५ अन्य प्रतिस्पर्धीको तुलनामा पृथक छ । युरो र एसियन एनक्यापमा ५ स्टार रेटिङ पाएको यस ईभी निकै सुरक्षित समेत छ । ब्याट्रीको कुरा गर्नुपर्दा यसमा हालसम्मकै अत्याधुनिक सर्ट ब्लेड ब्याट्री प्रयोग गरिएको छ । जसको चार्जिङ डिसचार्जिङ साइकल नै ३५ सय छ, जुन १० लाख किलोमिटर बराबर हुन्छ । हामीले दैनिक यात्रा गर्ने अभ्यासलाई आधार मान्दा यस ब्याट्रीको आयु ५० वर्ष छ भनेर जिलीले नै दाबी गरेको छ ।

वाटरप्रुफ, फायरप्रुफ र बुलेट प्रुफ विशेषताका कारण यसको ब्याट्री सुरक्षाका हिसावले अब्बल मानिन्छ । विभिन्न परीक्षणहरुले यसलाई प्रमाणित गरेको छ । सेभेन नेल पेनिट्रेसन गरेर परीक्षण गर्दा समेत ब्याट्रीमा कुनै क्षति पुगेन । ब्याट्री मजवुत भएकै कारण हामीले यसमा ८ वर्ष वा असीमित किलोमिटर वारेन्टी दिएका छौं ।

धेरै ब्रान्डको उपस्थितिले ईभी किन्ने ग्राहकमा एक प्रकारको अन्योलता सिर्जना गरेको देखिन्छ, यस विषयमा के सुझाव दिनुहुन्छ ?
ब्रान्ड धेरै भएपछि कुन रोज्ने विषयमा अन्योलता सिर्जना हुनु स्वाभाविक नै हो । तर, यसमा ग्राहकले निकै बुद्धिमानी भएर निर्णय लिनुपर्छ । आफूले किन्न लागेको ईभीले विश्व बजारमा कस्तो ब्रान्ड प्रिजेन्स जनाएको छ भन्ने विषयमा ग्राहकले राम्रोसँग बुझ्नु पर्छ । पछिल्लो समय नेपालमै पनि केही ब्रान्ड आएर छोटो समयमै बन्द भएको दृष्टान्तहरु छन् । यसले ग्राहकलाई समस्यामा पारेको छ । यस्तो नहोस् भन्नका लागि पनि ब्रान्ड भ्याल्यु र यसको विश्वब्यापी प्रिजेन्सका बारेमा राम्रोसँग बुझ्नै पर्ने हुन्छ । जिलीको सन्दर्भमा भन्नुपर्दा कम्पनीले हरेक महिना २ लाख ५० हजार युनिटका दरले आफ्ना सवारीसाधन विश्वबजारमा बिक्री गर्दै आएको छ ।

अर्को महत्वपूर्ण कुरा बिक्रेताले प्रदान गर्ने बिक्रीपछिको सेवाको सुनिश्चितता हो । गाडीमा समस्या आउँदा त्यसको छिटो छरितो र प्रभावकारी तवरले समाधान गर्नु आवश्यक हुन्छ । यसमा बिक्रेता कम्पनी कत्तिको जिम्मेवार भएर काम गरिरहेको छ भनेर हेर्नु पर्दछ । बाँकी गाडीको प्राविधिक र रेन्ज लगायत विषयमा त विभिन्न प्लेटफर्ममार्फत जानकारी पाउन सकिन्छ ।

जिली ब्रान्डमा आबद्ध ग्राहकलाई बिक्री र बिक्री पछिको सेवामा आश्वस्त पार्न एलआरआर मोटर्सको पहलकदमी कस्तो छ ?
एलआरआर मोटर्समा अटोमोबाइल क्षेत्रमा लामो समयदेखि काम गर्दै आएका ब्यक्तिहरुको आवद्धता छ । जसले गर्दा, हामी सवारीसाधन बिक्री र बिक्रिपछिको सेवा दुबैमा गम्भीर छौ । जिलीका गाडी बिक्री गर्न हामीले देशकै सबैभन्दा ठूलो र अत्याधुनिक शोरुम निर्माण गरेका छौं, जुन ५ रोपनी क्षेत्रफलमा फैलिएको छ । जहाँ गाडीको अवलोकन, पीडीआई र रुचि अनुसारको कलर छनोट गर्ने व्यवस्थासँगै क्विक रिपेयरिङ सेन्टरमार्फत बिक्री पछिको सेवा प्रदान गर्ने व्यवस्था मिलाएका छौ । देशभर शोरुम विस्तार गर्ने योजनासहित अघि बढेका छौ । हाललाई बुटवल र विराटनगरमा शोरुम खोलेका छौं, जहाँबाट सेल्स, सर्भिस र स्पेयर पार्ट्स सम्बन्धी सेवा उपलब्ध हुनेछ ।

जिली नेपाल आउँदै गर्दा यस ब्रान्डको आधिकारिकतामााथि नै प्रश्न उठेको थियो । यस विषयमा चाँहि के भन्नुहुन्छ ?
यसमा अन्योल हुनुपर्ने कुनै अवस्था नै छैन । पहिलो कुरा त नेपालमा कुनैपनि ब्रान्डहरु अवैधानिक रुपमा आउनै सक्दैनन् । सुरुमा ब्रान्ड नै आउँदैन् भन्ने भ्रम फैलाइएको थियो । तर ब्रान्ड आएरै छाड्यो । त्यसपछि यसका उत्पादन नै बिक्री हुँदैनन् भन्ने गरियो । अहिले हामीले निकै राम्रो संख्यामा बिक्री गरिरहेका छौं । हामी चीनस्थित उत्पादक कम्पनीसँग नजिक रहेर नेपाल सुहाउँदो उत्पादनलाई भित्र्याउँदै जाने तयारीमा छौ ।

एलआरआर मोटर्सले जिली ब्रान्डलाई प्रबद्र्धन गर्न गरेको पहलबाटै यस विषयमा देखिएका आशंकाहरु हटिसकेको पुष्टि गर्दछ । यी र यस्ता अफवाहहरुमा नलाग्न र ढुक्क भएर जिलीका उत्पादन प्रयाग गर्न हामी सम्पूर्ण ग्राहक वर्गमा आह्वान समेत गर्दछौ ।