५१० किलोमिटर रेन्ज दिने नयाँ ह्याचब्याक कार लन्च गर्दै लिपमोटर, यस्तो छ विशेषता

काठमाडौं–लिपमोटरले आफ्नो नयाँ ह्याचब्याक इलेक्ट्रिक कार ए०५ आगामी अगस्ट १० देखि आधिकारिक रूपमा बजारमा ल्याउने घोषणा गरेको छ । अन्तर्राष्ट्रिय बजारमा बी०३ नामले चिनिने यो कारको हाल प्रि–बुकिङ खुल्ला गरिएको छ । यो नयाँ मोडलले एक पटकको फुल चार्जमा ५१० किलोमिटरसम्मको रेन्ज दिने कम्पनीको दाबी छ ।

नयाँ लीपमोटर ए०५ को अगाडि क्लोज्ड ग्रिल, आकर्षक हेडलाइट, दुई रङको बडी डिजाइन, र अर्ध–लुकेका डोर ह्यान्डलहरू रहेका छन् । यो कार ४२०० मिमी लामो, १८०० मिमी फराकिलो र १५६० मिमी अग्लो छ भने यसको ह्विलबेस २६०५ मिमी रहेको छ ।

कारको भित्री भागमा आधुनिक प्रविधिको प्रयोग गरिएको छ । यसमा ८.८८ इन्चको डिजिटल इन्स्ट्रुमेन्ट क्लस्टर, १४.६ इन्चको सेन्ट्रल कन्ट्रोल स्क्रिन, २५६ रङको एम्बियन्ट लाइटिङ र १२ वटा स्पिकर भएको साउन्ड सिस्टम राखिएका छन् ।

यसको भित्री संरचनालाई क्वालकम स्न्यापड्र्यागन ८२९५ चिपले पावर दिएको छ । साथै, कारभित्र आरामदायी सिटहरू र ३३ वटा साना–ठूला स्टोरेज स्पेसहरू उपलब्ध गराइएको छ । यसको ट्रंक क्षमता ४७४ लिटर रहेको छ भने सिट फोल्ड गरेर यसलाई १३०८ लिटरसम्म बढाउन सकिन्छ ।

यस नयाँ कारमा ३९.८ र ५३ किलोवाट आवरको ब्याट्री प्याक तथा ७० किलोवाट र ९० किलोवाट क्षमताको मोटर बिकल्प उपलब्ध हुनेछ, जसले क्रमशः ४०५ किलोमिटर र ५१० किलोमिटरको रेन्ज प्रदान गर्ने दाबी गरिएको छ ।

लिपमोटर ए०५ भविष्यमा नेपाली बजारमा समेत उपलब्ध हुने अनुमान गर्न सकिन्छ । नेपालमा लिपमोटरका उत्पादन सांग्रिला मोटर्सले बिक्री गर्दै आएको छ ।