ट्राफिक व्यस्थापन गर्न ललितपुर महानगरले सुरु गर्‍यो ‘समानान्तर पार्किङ’

काठमाडौँ । ललितपुर महानगरपालिकाले समानान्तर पार्किङ विस्तार गरेको छ । यसअघि जावलाखेलस्थित खरिबोटबाट भनिमण्डलतर्फको सडकमा समानान्तर पार्किङ शुरू महानगरले आज (आइतबार)देखि कुमारीपाटीमा पनि सोही नियम लागू गरेको हो ।

सडक छेउमा जथाभाबी पार्किङ गर्दा ट्राफिक व्यस्थापनमा समस्या भएकोले कुमारीपाटीमा समानान्तर पार्किङ शुरू गरिएको पालिकाले जनाएको छ ।

पालिकाकाे अनुसार समानान्तर पार्किङ गर्दा थोरै स्थान ओगट्ने र ट्राफिक व्यवस्थापन गर्न सहज भएको छ । समानान्तर पार्किङलाई आवश्यकताका आधारमा थप विस्तार गर्ने योजना रहेको र पहिलो चरणमा खरिबोट–भनिमण्डलबाट शुरू गरिएको यो नियम आजदेखि कुमारीपाटीमा लागू भएको भन्दै क्रमशः अन्य ठाउँमा पनि लागू गरिने नगर प्रहरी प्रमुख सीताराम हाछेथुले जानकारी दिए ।

सबैसँग समन्वय गरेर पार्किङ व्यवस्थापनको काम भइरहेको र सबैलाई सजिलो हुनेगरी पार्किङ व्यवस्थापन गर्न महानगर प्रमुख चिरीबाबु महर्जनले निर्देशन दिएका छन् ।