वृद्धहरुका लागि लाेकप्रिय केजी मोटर्सकाे एक सिटे इलेक्ट्रिक कार

जापानको एक सानो स्टार्टअप कम्पनी केजी मोटर्सले बनाएको एक सिटे इलेक्ट्रिक कार "मिबोट" ले जापानमा चर्चा बटुल्दैछ। सानो आकार, कम मूल्य र ग्रामीण प्रयोगकर्तालाई लक्षित सो कार अहिले सामाजिक सञ्जालमा भाइरल भइरहेको छ ।

मिबोट केवल एक जना बस्न मिल्ने कार हो, जुन १०० किलोमिटरको रेन्ज, ६० किलोमिटर प्रतिघण्टा गति र ५ घण्टामा चार्ज हुने क्षमता राख्छ। यसको मूल्य करिब ११ लाख रुपैयाँ पर्छ। यो विशेष गरी साँघुरा गल्ली र गाउँका सडकका लागि डिजाइन गरिएको हो।

केजी मोटर्सका संस्थापक काजुनारी कुसुनोकीले वृद्ध मानिसहरुको समस्या देखेपछि सस्तो र सरल सवारी बनाउने सोच विकसित गरेका थिए । उनले २०२२ मा कम्पनी स्थापना गरेका थिए । कम्पनीले अहिलेसम्म २ हजार २५० युनिट भन्दा बढी अर्डर प्राप्त गरिसकेको छ ।

जापानमा इलेक्ट्रिक सवारी साधनको प्रयोग कम भए पनि ‘केई कार’ जस्ता साना सवारी निकै लोकप्रिय छन् । मिबोट पनि यही श्रेणीमा पर्छ तर यो एकदम न्यूनतम डिजाइन भएको, एक सिटे कार हो, जसले गाउँ–गाउँमा निजी सवारीको सम्भावना बढाएको छ।