जीपले यो बर्ष भारतमा ३ वटा एसयुभी लन्च गर्ने

अमेरिकन ब्रान्ड जीपले यो बर्ष भारतमा तीनवटा एसयुभी लन्च गर्ने बताएको छ । जसमध्ये २ वटा नयाँ र एउटा कम्पासको ट्रायल हक भेरियन्ट हुनेछ । नयाँ एसयुभी मेरिडियन र ग्रान्ड चेरोकीलाई यसैबर्षको मध्यसम्ममा लन्च गरिने जीपले बताएको हो ।

त्यसैगरी हाल कारोबार भैरहेको कम्पासको नयाँ भेरियन्ट ट्रायल हकलाई १ बर्षपछि अपडेट गरेर पूनः बजारमा ल्याउन लागिएको हो । ट्रायल हकलाई कम्पनीले सिमित संख्यामा मात्र उत्पादन गर्ने अनुमान लगाइएको छ ।

कम्पनीले ल्याउन लागेको अर्को नयाँ मोडल मेरिडियनलाई कम्पासमा आधारित रहि निर्माण गरिने बताइएको छ । कम्पासकै बेसमा उत्पादन गरिएपनि यो एसयुभी केही ठूलो हुनेछ । जसमा कम्पासमा प्रयोग गरिएको २.० लिटर डिजेल इन्जिनलाई नै निरन्तरता दिइने र हालको १७० बिएचपी पावरलाई बढाएर २०० बिएचपीसम्म पुर्याइनेछ । जीपले यो एसयुभीमा माइल्ड हाइब्रिड प्रबिधी समेत थप गर्न सक्ने बताएको छ । ३५ लाख भारु हाराहारी मूल्य पर्ने अनुमान लगाइएका मेरिडयनमा ९ स्पिड अटोमेटिक गियरबक्स जडान गरिनेछ ।

त्यसैगरी अघिल्लो बर्ष अन्तराष्ट्र्रिय बजारमा सार्बजनिक गरिएको ग्रान्ड चेरोकीको अल न्यू मोडललाई जीपले भारतीय प्लान्टमा एसेम्बल गर्ने जनाएको छ । अन्तराष्ट्र्रिय बजारमा ५ र ७ सिटर अप्सनमा उपलब्ध यो एसयुभीको ५ सिटरलाई भारतमै एसेम्बल गर्न लागिएको हो । पेट्रोल, डिजेल र प्लग इन हाइब्रिज इन्जिनमा उपलब्ध यो एसयुभीलाई जीपले भारतमा भने डिजेल इन्जिनलाई प्राथमिकत नदिने देखिएको छ । यो एसयुभीमा ३.६ लिटर पेट्रोल भी६ इन्जिन जडान गरिनेछ जसको अधिकतम पावर २९० एचपी रहने अनुमान लगाइएको छ । यसको मूल्य भारतमा ६५ देखी ७५ लाख भारुसम्म पर्न सक्ने अनुमान लगाइएको छ ।