इलेक्ट्रिक सवारी साधनको सर्भिसिङ कसरी गरिन्छ ? इन्जिन र जटिल पार्ट्स नभए पनि के मा हुन्छ खर्च ?

इलेक्ट्रिक सवारी साधन अर्थात ईभीले प्रदूषण कम गर्ने र सर्भिसिङको लागि पनि कम लागत लाग्ने भएकाले यसको लोकप्रियता पछिल्लो समय निकै बढेको छ । यद्यपि इलेक्ट्रिक कारमा न त इन्जिन हुन्छ न त कार जस्तै कम्बसन इन्जिन र जटिल पार्ट्स । त्यसो भए इलेक्ट्रिक कारको सर्भिसिङमा के खर्च हुन्छ त ?

इलेक्ट्रिक कारको सर्भिसको बेला के के जाँच गरिन्छ र पार्टपुर्जाको लाइफ कस्तो हुन्छ भन्ने वारेमा थाहा पाउनु उपयुक्त हुन्छ । यसका लागि इलेक्ट्रिक भेइकलले कसरी काम गर्छ र यसको कुन पार्ट्समा हामीले ध्यान राख्नु आवश्यक हुन्छ भन्ने वारेमा थाहा हुनु आवश्यक हुन्छ ।

यसका लागि सर्भिसिङ गर्दा के चेकजाँच गरिन्छ र कुन पार्ट्सको लाइफ कति हुन्छ भन्ने वारेमा समेत थाहा हुनु राम्रो हुन्छ ।

इलेक्ट्रिक कारमा यसकारण बच्छ पैसा

इलेक्ट्रिक कारमा इन्जिन नहुने भएकाले यसमा इन्जिनसँग सम्बन्धित कुनै पनि प्रकारको मर्मतसम्भार जस्तै ः इन्जिन आयल, फिल्टर, एयर फिल्टर, कूलेन्ट आदिमा खर्च बचत हुन्छ ।

इन्जिन नहुने भएकाले यसको वजन पनि कम हुन्छ र सस्पेन्सनमा पनि त्यति भार पर्दैन । जसले गर्दा इलेक्ट्रिक कारको सस्पेन्सनको आयु सामान्य कारको तुलनामा ४ गुणा लामो हुन्छ ।

इलेक्ट्रिक कारमा नगण्य मात्रामा भाइब्रेसन हुने हुनाले कारको बडीमा धेरै क्षति पनि हुँदैन । अन्य कार जस्तो केही समय पछि कारको ढोका वा प्यानलबाट आउने आवाज पनि आउदैन । यसबाट डेन्टर खर्च पनि बचत हुन्छ ।

ईभी कारका टायर अन्य कारको तुलनामा धेरै लामो समयसम्म टिक्छ । यसको कारण पनि खर्चमा बचत हुन्छ ।

कहाँ हुन्छ खर्च ?

ईभीमा कम्बसन इन्जिन नभए पनि यसको ब्याट्री, किट र ड्राइभ मोड्युल हुन्छ । यस्ता पार्ट्सको लाइफ धेरै हुने भए पनि बिग्रिएमा भने लाखौंसम्मको खर्च हुन सक्छ ।

ईभीको ब्याट्रीको आयु लगभग ७ देखि ८ वर्षको हुन्छ । सो समय पछि ईभी कारको ब्याट्रीको लागि लाखौ रुपैयाँ लाग्ने अनुमान गर्न सकिन्छ ।

ईभी कारको ब्रेक प्याड, डिस्क र स्टेयरिङ पनि अन्य कार जस्तै सर्भिसिङ गर्नुपर्छ । साथै एसीको सर्भिस पनि सामान्य कारमा जस्तै गरिन्छ ।

ईभी कारमा धेरै मात्रामा वायरिङ हुने हुनाले बाहिरबाट इलेक्ट्रिक फिटिङ गर्नुहुँदैन । यदि कुनै कारणवश कारको तारमा केही खराबी आएमा लाखौं खर्च हुन सक्छ ।