जीपीएस र एपको प्रयोग गरी सुरक्षित रहन आग्रह : यस्ता छन् सवारी सुरक्षाका लागि नयाँ प्रोडक्ट

काठमाडौं – जियोमेट र एटीएस नेपाल तथा नेपाल अटो मेकानिक्स व्यवसायी संघको आयोजनामा विभिन्न प्रोडक्ट सम्बन्धी जानकारीमूलक कार्यक्रम सम्पन्न भएको छ । शनिबार आयोजित सो कार्यक्रममा ललितपुर जिल्लामा कार्यरत बाइक मर्मत गर्ने अटो मेकानिक्सहरुका बीचमा जियोमेट जीपीएस र एटीएस नेपालको एप वारेमा जानकारी प्रदान गरिएको थियो ।

सो अवसरमा जियोमेट जीपीएस उपलब्ध गराइरहेको टेलिम्याटिक्स टेक प्रालि सीईओ आतिश गैरे र एटीएस नेपालका एक्जिक्युटिभ डाइरेक्टर विजय कँडेलले ती प्रोडक्ट र तिनको उपयोगिता वारेमा जानकारी प्रदान गरे ।

जियोमेटले सवारी साधनहरुको अवस्थिति वारेमा जानकारी प्रदान गर्दछ । नेपाली बजारमा यो पहिले देखि नै उपलब्ध छ ।

एटीएस नेपाल भने हालै मात्र बजारमा उपलब्ध गराइएको सुविधा सहितको एप हो । यसको प्रयोगबाट कुनै सवारी साधन हराएको वा बेवारिस भएको अवस्थामा सम्बन्धित सवारी धनी पत्ता लगाउन सकिन्छ ।

उक्त एप डाउनलोड गरी आफ्नो मोबाइलमा राख्ने र एटीएस नेपालले उपलब्ध गराएको क्युआर कोड सवारी साधनको कुनै स्थानमा राख्ने गरेमा सो क्युआर कोड स्क्यान गरी जसले पनि सवारी धनी पत्ता लगाउन र खबर गर्न सकिन्छ । क्युआर कोड स्क्यान गर्दा आउने फोन नम्बरमा फोन गरेर यो कार्य गर्न सकिन्छ । विशेष गरी दुर्घटना भएको अवस्थामा वा कुनै कारणले चोरी भएको अवस्थामा यो एप निकै नै प्रभावकारी हुने सम्भावना छ ।

सो अवसरमा ट्राफिक प्रहरी निरीक्षक शालिग्राम तिमिल्सिनाले दुर्घटना भएको अवस्थामा सवारी धनीको आफन्त पत्ता लगाउन र हराएका मोटरसाइकलको सवारी धनी पत्ता लगाउन निकै समस्या परिरहने अवस्थामा यो एप निकै नै प्रभावकारी हुने बताए ।

नेपाल अटो मेकानिक्स व्यवसायी संघका अध्यक्ष रुद्रबहादुर खड्काले मेकानिक्सहरुले समेत यो एप उपयोग गर्नका लागि सवारी धनीहरुलाई प्रेरित गर्न सकेमा निकै नै प्रभावकारी हुने र यसमा आफूहरुले सक्दो प्रयास गर्ने बताए ।

नेपाल अटो मेकानिक्स व्यवसायी संघका निवर्तमान अध्यक्ष राजकुमार बिकेले क्युआर कोड स्क्यान गरेर एप खरिद कार्यको शुभारम्भ गर्दै धेरै सवारी धनीलाई यस्ता एप्स प्रयोग गर्नका लागि प्रेरित गर्न सकिने बताए ।