अपग्रेड भएर आउँदै क्रसफायर आरएम २५०, टिजर सार्वजनिक

काठमाडौं– क्रसफायरले नेपाल ल्याएको चर्चित डर्ट बाइक आरएम २५० अपग्रेड भएर आउने भएको छ । आरएम २५० को अपग्रेडेड भर्सन छिट्टै नेपाल आउन लागेको जानकारी दिँदै आधिकारिक वितरक क्लासिक ह्विल्स एक्सपोर्ट एण्ड इम्पोर्ट प्रालिले सो नयाँ मोटरसाइकलको टिजर सार्वजनिक गरेको हो ।

आरएम २५० को अपग्रेडेड भर्सनमा नयाँ ईएफआई इन्जिन हुने कम्पनीले जनाएको छ । कटिङ एज ईएफआई इन्जिनका कारण सो नयाँ भर्सनले झनै उत्कृष्ट पावर र पर्फमेन्स दिने दाबी गरिएको छ ।

क्रसफायरको सो अपग्रेडेड भर्सनमा के–कस्ता फिचर परिमार्जन हुन्छन् भन्ने विषय सार्वजनिक नगरिए पनि नयाँ मोटरसाइकल पुरानो मोडलको तुलनामा थप आकर्षक र अफरोडमैत्री हुने अनुमान गरिएको छ ।

सो नयाँ मोडलको मोटरसाइकलको नाम समेत अझै निश्चित गरिएको छैन । यद्यपि यसले पर्फमेन्स, इनोभेसन र रिलायबिलिटीका लागि नेपालको डर्ट बाइक सेगमेन्टमा एक बेन्चमार्क स्थापित गर्ने कम्पनीको दावी छ ।

आधुनिक राइडरको आवश्यकतालाई पुरा गर्ने किसिमले यसका मुख्य कम्पोनेन्टमा अत्याधुनिक तरिकाले अपग्रेड समेत गरिने कम्पनीको भनाइ छ ।

क्लासिक ह्विल्सले छिट्टै यसको बुकिङ खुल्ने जानकारी दिएको छ ।