सिट्रोनको इलेक्ट्रिक कार ई–सी३ दुई भेरिएन्टमा नेपालमा उपलब्ध हुने

काठमाडौं – सिट्रोनको इलेक्ट्रिक कार ई–सी३ नेपाली बजारमा दुई भेरिएन्टमा उपलब्ध हुने भएको छ । सिट्रोनको नेपालका लागि आधिकारिक वितरक सांग्रिला मोटर्सले लाइभ र फिल विथ प्याक भाइव गरी दुई भेरिएन्टमा सो गाडी नेपाली बजारमा उपलब्ध हुने जनाएको छ ।

यी दुई भेरिएन्टको मूल्य क्रमशः ३२ लाख ९९ हजार र ३४ लाख ९९ हजार रुपैयाँ हुनेछ । सो गाडी सन् २०२३ को जुलाईमा नेपालमा सार्वजनिक गर्ने घोषणा कम्पनीले गरेको छ।

सांग्रिला मोटर्सले सो गाडीको बुकिङ खुला गरिसकेको छ । विर्तामोड, विराटनगर, इटहरी, नारायणघाट, बुटवल, पोखरा र काठमाडौं उपत्यका लगायत नेपालका सात प्रमुख शहरहरुमा रहेका सिट्रोनका सबै आधिकारिक शोरुमहरुमा बुकिङका लागि सो गाडी उपलब्ध हुने कम्पनीको भनाइ छ ।

५७ पीएसको इलेक्ट्रिक मोटर र १४३ एनएमको टर्क सहितको इन्जिनले आनन्ददायी ड्राइभिङको अनुभव प्रदान गर्ने र यसले सिंगल चार्जमा ३२० किलोमिटर सम्मको रेन्ज दिने कम्पनीको भनाइ छ ।

ई–सी३ ले नेपालमा पहिलो पटक चार्जिङमा क्रान्ति ल्याउने अनौठो प्रविधि भित्र्याएको बताएको छ । परम्परागत एक डीसी चार्जिङ भन्दा धेरै डीसी चार्जिङ सुविधा उपलब्ध हुने बताइएको छ ।