३ अर्ब लगानीमा चिनियाँ कम्पनीले नेपालमै विद्युतिय गाडी उत्पादन गर्ने

काठमाडौं– चिनियाँ कम्पनी सिएन गोल्ड ड्रागन अटोबडीले नेपालमा विद्युतीय गाडी उत्पादनका लागि ३ अर्ब रुपैयाँ वैदेशिक लगानी सम्झौता गरेको छ ।

कम्पनीले लगानी सम्मेलन अवसर पारेर नेपालको कोसी एनके मोटर्ससँगको सहकार्यमा वार्षिक ५००० थान बढी बिजुली गाडी उत्पादन गर्ने योजना सार्वजनिक गरेको हो ।

कम्पनीले सुरुमा व्यावसायिक प्रयोजनमा प्रयोग हुने चारपांग्रे सवारीसाधन उत्पादनमा जोड दिने जनाइएको छ । यही वर्षबाटै गाडी उत्पादन सुरु गर्ने कम्पनीले योजना बनाएको छ ।

प्लान्टका लागि विराटनगरको बूढीगंगामा १५ बिघा जग्गा लिइसकेको कम्पनीले जनाएको छ । प्लान्टबाट १४, १८ र १२ सिटे क्षमताका कमर्सियल गाडी उत्पादन गर्ने योजना बनाइएको छ ।