क्यानडेली कम्पनीद्वारा जासुसीका लागि ड्रोन र राडारबाट लुक्न सक्ने विशेष इलेक्ट्रिक बाइकको विकास

क्यानडाको एक कम्पनीले सेनाका लागि जासुसी र निगरानी कार्यमा प्रयोग गर्न सकिने अत्याधुनिक इलेक्ट्रिक मोटरसाइकल विकास गरेको छ। क्यानडेली कम्पनी इआउटडोर्स लिमिटेडले सैन्य प्रयोजनका विशेष इलेक्ट्रिक सवारी साधन विकास गर्ने उद्देश्यले नयाँ स्टार्टअप नर्थफोर्ज स्थापना गरेको हो । यही स्टार्टअपले आफ्नो पहिलो परियोजनाको रूपमा डिस्प्याच नामक विशेष बाइक पेश गरेको छ ।

डिस्प्याच इलेक्ट्रिक बाइक परम्परागत मोटरसाइकलभन्दा पूर्ण रूपमा फरक तरिकाले निर्माण गरिएको छ। सामान्यतया सेनाले बजारमा उपलब्ध मोटरसाइकललाई परिमार्जन गरेर प्रयोग गर्ने गर्छ, तर सो बाइक सुरुदेखि नै युद्ध र जासुसी कार्यका लागि लक्षित गरी डिजाइन गरिएको हो । सो बाइक सानो साइजको भएकाले साँघुरा बाटोमा पनि सजिलै चलाउन सकिन्छ ।

युद्धका समयमा ड्रोनले सामान्यतया ठुला सवारी साधनहरू सजिलै पत्ता लगाउन सक्छ । तर सो इलेक्ट्रिक बाइक आकारमा सानो भएकाले ड्रोनले पत्ता लगाउन कठिन हुन्छ। यसको इलेक्ट्रिक इन्जिन अत्यन्त शान्त हुने भएकाले चल्दा लगभग आवाज नआउने विशेषता छ। साथै यसले अत्यन्त कम ताप उत्सर्जन गर्ने भएकाले शत्रुपक्षले प्रयोग गर्ने थर्मल सेन्सर वा राडार सिस्टमले पनि यसलाई ट्र्याक गर्न निकै कठिन हुने बताइएको छ।

सो बाइक विभिन्न कठोर मौसम परिस्थितिमा पनि सहज रूपमा सञ्चालन हुने गरी डिजाइन गरिएको छ। सामान्यतया अत्यधिक चिसो मौसममा इलेक्ट्रिक सवारी साधनले समस्या देखाउने सम्भावना हुन्छ, तर सो बाइक विशेष रूपमा क्यानडाको हिउँले ढाकिएको भूभागलाई ध्यानमा राखेर बनाइएको हो। यसले माइनस ३५ डिग्री सेल्सियसको चिसोदेखि ४५ डिग्री सेल्सियससम्मको अत्यधिक गर्मीमा पनि बिना अवरोध सञ्चालन गर्न सक्ने क्षमता राख्छ।

बाइकलाई मोड्युलर डिजाइनमा बनाइएको छ, जसका कारण लडाइँका क्रममा कुनै भाग बिग्रिएमा त्यसलाई तुरुन्तै फेर्न सकिन्छ। सैनिकहरूले नै फिल्डमै यसको मर्मत गर्न सक्ने भएकाले मेकानिकको आवश्यकता पर्दैन। यही कारणले सो बाइकलाई आधुनिक सैन्य प्रविधिको महत्वपूर्ण उपलब्धिका रूपमा हेरिएको छ।