चिनियाँ बजारभन्दा विदेशमा झन्डै दोब्बर महँगो, बीवाईडीको सुपरकारले विश्व बजार तताउँदै

काठमाडौं–बीवाईडीको प्रिमियम सब–ब्रान्ड डेन्जाले आफ्नो नयाँ इलेक्ट्रिक सुपरकार डेन्जा जेडको मूल्य सार्वजनिक गरेसँगै विश्व बजारमा नयाँ हलचल पैदा भएको छ । अत्यधिक पावर र अत्याधुनिक प्रविधिले सुसज्जित यस हाइपरकारको स्वदेशी (चिनियाँ) र अन्तर्राष्ट्रिय बजारको मूल्यमा भने निकै ठूलो अन्तर देखिएको छ ।

चीनमा यस सुपरकारको प्रि–सेल ६ लाख ८० हजार युआन (करिब १,००,३०० अमेरिकी डलर) बाट सुरु हुन्छ । तर, विदेशी बजारमा पुग्दा यसको मूल्य निकै महँगो पर्न जान्छ ।

बेलायतमा यसको इन्ट्री लेभल कूप ट्रिमको सुरुवाती मूल्य १ लाख ४२ हजार ९०० पाउन्ड (करिब १,८४,८०० अमेरिकी डलर) तोकिएको छ, जुन चिनियाँ बजारको तुलनामा ८४ हजार डलरभन्दा बढी हो । बेलायतमा आयोजित प्रसिद्ध ‘गुडउड फेस्टिभल अफ स्पिड’ मा यसको विश्वव्यापी प्रदर्शन गरिएपछि यो मूल्य पुष्टि भएको हो ।

तीनवटा शक्तिशाली मोटर जडित यो हाइपरकारले १ हजार ५८२ हर्सपावरको संयुक्त ऊर्जा पैदा गर्छ, जसले यसको इन्टेलिजेन्ट अल–ह्वील–ड्राइभ प्लेटफर्मलाई शक्ति प्रदान गर्दछ । यसको पछाडिको एक्सलमा ३० हजार आरपीएमसम्म घुम्न सक्ने दुईवटा स्वतन्त्र इलेक्ट्रिक मोटरहरू राखिएका छन् । यही शक्तिका कारण यसको विशेष रेसिङ ट्रिमले मात्र १.९६ सेकेन्डमा ० देखि १०० किमी÷घण्टा को गति समात्न सक्ने दाबी गरिएको छ त्यसैगरी, यसको टप स्पीड प्रतिघण्टा ३५० किलोमिटर प्रमाणित गरिएको छ ।

यस कारमा अत्याधुनिक स्टियर–बाइ–वायर चेसिस प्रयोग गरिएको छ । यस प्रणालीले परम्परागत मेकानिकल स्टेयरिङ लिङ्कहरूलाई पूर्ण रूपमा हटाएर ट्र्याकमा गाडीको रेस्पोन्सलाई अझ बढी प्रभावकारी र सटिक बनाउँछ ।

सामान्यतया दुई सिटमा मात्र आउने सुपरकारहरू भन्दा फरक, कूप हार्डटप मोडलमा चार सिटको प्रिमियम इन्टेरियर लेआउट दिइएको छ । यसको लम्बाइ ४,७८० मिमी, चौडाइ १,९९० मिमी र ह्विलबेस २,७८० मिमी रहेको छ ।

यसमा ७६ किलोवाट आवर क्षमताको दोस्रो पुस्ताको फ्ल्याट–प्याक लिथियम–आइरन–फस्फेट ब्लेड ब्याट्री प्रयोग गरिएको छ । गाडीमा डुअल–गन फ्ल्यास चार्जिङ’ प्रविधि उपलब्ध छ, जसको मद्दतले मात्र ९ मिनेटमा १० प्रतिशतबाट ९७ प्रतिशतसम्म ब्याट्री चार्ज गर्न सकिन्छ । आकस्मिक अवस्थाका लागि, मात्र ५ मिनेटको छोटो चार्जले पनि ब्याट्रीलाई १० प्रतिशतबाट ७० प्रतिशततसम्म पु¥याउँन सकिन्छ ।