यस्ता छन् बीवाईडी र चांगनका इलेक्ट्रिक भ्यान (मूल्य, ब्याट्री क्षमता र रेन्ज सहित)

इलेक्ट्रिक सवारीसाधनको माग बढेसँगै बजारमा विभिन्न सेग्मेन्टका यस्ता साधन भित्रिन थालेका छन् । बजारमा अहिले कार, मोटरसाइकल र अटो रिक्सा सहित प्यासेन्जर भ्यानको समेत विक्री हुन थालिसकेको छ ।

नेटा ब्रान्डको इलेक्ट्रिक कार आयात गरेर चर्चामा आएको सिजी मोटर्सले केही समयअघि चांगन ब्रान्डको भ्यान समेत भित्र्याएको छ । यो भ्यान आउनुअघि बीवाईडी र दीगो ब्रान्डमा यस्ता भ्यान उपलब्ध थिए ।

बीवाईडीले बिक्री गर्दै आइरहेको एमपी३ मोडलको इलेक्ट्रिक भ्यानमा ७ जना यात्रुले सवार गर्न मिल्छ भने चांगनको भी५ को सिट क्षमता ११ जना रहेको छ । जसमध्ये एम३ मा ४९.९ किलोवाट आवर क्षमताको ब्लेड ब्याट्री जडान गरिएको छ भने भी५ मा ४१.८६ किलोवाट आवरको सीएटीएल ब्याट्री दिइएको छ । यी दुई मोडलको रेन्ज क्रमशः २७५ किलोमिटर र ३०० किलोमिटर दावी गरिएको छ । यी दुवै भ्यानको उच्च गति अधिकतम १०० किलोमिटर रहेको छ ।

ग्राउन्ड क्लियरेन्सको कुरा गर्नुपर्दा एम३ को १८० एमएम र भी५ को १७५ एमएम रहेको छ । ७ सिटर भएर पनि मूल्यको मामलमा भने बीवाईडी एमपी३ चांगन भी५ को तुलनामा ३ लाख रुपैयाँले महंगो छ । एमपी३ लाई आधिकारिक विक्रेता साइमेक्स इंक प्रालिले ४५ लाख ५२ हजार रुपैयाँमा बिक्री गर्दै आइरहेको छ भने भी५ को मूल्य ४२ लाख ५० हजार रुपैयाँ निर्धारण गरिएको छ ।