बीवाईडी एट्टो ३ : फरेस्ट ग्रिन कलरमा १०० युनिट मात्र नेपाल आउने, मूल्य १ लाख बढी

काठमाडौं – नेपाली बजारमा उपलब्ध बीवाईडी एट्टो ३ का विभिन्न भेरिएन्ट मध्ये १०० किलोवाट मोटर क्षमतामा नयाँ कलर फरेस्ट ग्रिन समेत उपलब्ध हुने भएको छ ।

बीवाईडीको नेपालका लागि आधिकारिक वितरक साइमेक्स इंकले सो इलेक्ट्रिक कारको नयाँ कलर भेरिएन्ट उपलब्ध गराउने बताएको छ । यसको लागि बुकिङ खुला गरिएको छ ।

यद्यपि नेपाली बजारमा सो कलर भेरिएन्ट सहितको बीवाईडी एट्टो ३ जम्मा १०० युनिट मात्र बिक्रीका लागि उपलब्ध हुनेछ । यसको मूल्य पनि अन्य कलर भेरिएन्टको तुलनामा १ लाख रुपैयाँ बढी हुनेछ ।

सो गाडीमा ६०.४८ किलोवाट आवरको ब्याट्री प्याक छ । १०० किलोवाट मोटर भएको बीवाईडी एट्टो ३ को मूल्य ६५ लाख ८८ हजार छ । तर फरेस्ट ग्रिन कलरयुक्त बीवाईडी एट्टो ३ को मूल्य भने ६६ लाख ८८ हजार रुपैयाँ हुनेछ ।

फरेस्ट ग्रिन कलर धेरैले रुचाउने कलर भएकाले यसको मूल्य बढी राखिएको कम्पनी स्रोतको भनाइ छ । अन्य फिचर भने उही हुनेछ ।

कम्पनीको दावी अनुसार यो कारलाई एकपटक फूल चार्ज गर्दा ४२० किलोमिटर रेन्ज पाउन सकिन्छ । ७ किलोवाटको चार्जरबाट चार्ज गर्दा ६ घन्टा १० मिनेटमा फुल चार्ज गर्न सकिने एट्टो ३ लाई ८० किलोवाटको डिसी फास्ट चार्जरले ४५ मिनेटमा फुल चार्ज गर्न सकिन्छ ।

यो कारको टर्क ३१० एनएम रहेको छ भने ग्राउन्ड क्लियरेन्स १७५ एमएम रहको छ । ५ जनाले आरामदायी यात्रा गर्न सकिने एट्टो ३ को वुट स्पेस ४४० लिटर छ।