८२ हजारले अवलोकन गरे नाडा अटो शो २०२४, कुन कम्पनीको बुकिङ कति ?

काठमाडौं – गत भाद्र ११ देखि प्रारम्भ भएको नाडा अटो शो २०२४ हिजो समापन भएको छ । उक्त १६ संस्करणको नाडा अटो शो २०२४ मा ८२ हजार ४७० दर्शकहरुले अबलोकन गरेको नाडाले आधिकारिक रुपमा जानकारी प्रदान गरेको छ ।

निकै ब्यवस्थित रुपमा सञ्चालित यस प्रदर्शनीमा उत्कृष्ट रुपमा श्रृंगारिएका स्टल र अन्तर्राष्ट्रिय रुपमा नाम चलेका लेटेष्ट मोडेलका सवारी साधनहरुका कारण यो प्रदर्शनी गत बर्षहरुमा भन्दा निकै भब्य रुपमा सम्पन्न भएको छ । थुप्रै नयाँ ब्रान्डका विद्युतिय सवारी साधनहरुको सहभागिताका कारण यो प्रदर्शनीमा निकै ठूलो भिड लागेको थियो । यो अटो शो बिगतमा भन्दा निकै भब्य र बृहत भएको अबलोकनकर्ताहरुले समेत टिप्पणी गरेका छन् । अत्यन्तै सुस्ताइरहेको अटोमोवाइल व्यवसायका बावजुद पनि आयोजना गरिएको यो अटो शो ले देशको अर्थ व्यवस्थालाई चलायमान बनाउन सहायकसिद्ध भएको छ ।

समापन कार्यक्रममा नाडाका अध्यक्ष करण चौधरीले नाडा अटो शो २०२४ लाई सफल बनाउन सहयोग पु¥याउने सवै सरोकारवाला कम्पनी र संस्था सवैलाई धन्यवाद दिए ।

समापनसँगै अटो शोमा आफ्ना सवारी साधन प्रदर्शन गरेका विभिन्न कम्पनीहरुले आफ्ना गतिविधि वारेमा जानकारी सार्वजनिक गरेका छन् । विशेष गरी विद्युतीय सवारी साधनको बर्चस्व रहेको उक्त अटो शोमा विद्युतीय कार र स्कुटर लगायतका स्टलमा दर्शक झुम्मिएको पाइन्थ्यो ।

नाडा अटो शोमा सबैभन्दा बढी रेन्ज दिने विद्युतीय कार स्काइवेलका विभिन्न मोडल सार्वजनिक गरेको जी मोटर्सले १२६ युनिट गाडी बुकिङ भएको जानकारी सार्वजनिक गरेको छ । ६२०, ५२० र ४१० किलोमिटर रेन्ज दिने इलेक्ट्रिक एसयूभी प्रदर्शन गरिएको स्काइवेलका यी ईभी एसयूभीको मूल्य पनि अन्य ईभीको तुलनामा धेरै छ । ४१० किमी बीई११ को मूल्य ७५ लाख ९० हजार, बीई११ ५२० किमीको मूल्य ८५ लाख ९० हजार र ईटी५ को मुल्य १ करोड १० लाख रुपैयाँ कायम गरिएको थियो । यद्यपि यो मूल्यमा अब अझै ५ लाख रुपैयाँ बढ्ने बताइएको छ ।

नेपाली बजारमा हालै मात्र भित्रिएको टाटा पन्च ईभीले विशेष चर्चा पायो । टाटाको नेपालका लागि आधिकारिक वितरक सिप्रदी ट्रेडिङ प्रालिले सबै गरी ६४४ गाडी बुकिङ भएको र ती मध्ये पन्च ईभीकै बुकिङ ४७५ युनिट भएको बताएको छ ।

३३ लाख ९९ हजार रुपैयाँ मूल्यबाट प्रारम्भ हुने पन्च ईभीमा डेडिकेटेड ईभी प्लेटफर्म ‘एक्ट ईभी’ प्रयोग गरिएको छ । पर्फमेन्स निकै राम्रो रहेको र नेपालको अटो बजारमा सिप्रदिले आर्जन गरेको छुट्टै लिगेसीका कारण पनि पन्च ईभीले नेपाली ईभी पारखीको विश्वास जित्नेमा ढुक्क हुन सकिन्छ ।

अटो शोमा चर्चा पाएको अर्को ब्रान्ड नामी हो । हालै मात्र नेपाली बजारमा भित्रिएको नामी ब्रान्डले नेपाली अटो बजारमा फरक पहिचान कायम गर्ने अनुमान गरिएको छ । नामीको नेपालका लागि आधिकारिक वितरक एमएडब्लु वृद्धि अटोकर्पका अनुसार ७१७ युनिट नामी ईभी बुकिङ भएका छन् ।

यो फ्युचरिस्टिक ह्याचब्याक ईभीप्रेमीलाई सुहाउने गरी नामी ई१, नामी ई२ र नामी ई३ गरी तीन भेरिएन्टमा उपलब्ध छ जसको सुरुवाती मूल्य क्रमसः २९ लाख ९९ हजार, ३१ लाख ९९ हजार र ३४ लाख ९९ हजार रुपैयाँ रहेको छ । ड्युअल टोनको लागि भने थप ५० हजार रुपैयाँ लाग्ने छ ।

एमएडब्लु वृद्धि अटोकर्पले उपलब्ध गराएका अन्य ब्रान्ड सेरेसका २१० र दिपलका १६५ युनिट भन्दा बढी बुकिङ भएका छन् । सेरेसका सेरेस ३ र मिनी ईभीका साथै दिपलका एल०७ र एस०७ अन्य चर्चित ईभी हुन् । अटो शोमा चर्चा कमाएका यी अन्य ब्रान्ड हुन् ।

जेको जे६ र ओमोडा ई५ लगायतका मोडल प्रदर्शन गरेको एसपीजी अटोमोबाइलले यी दुई ब्रान्डका ३५० युनिट भन्दा बढी बुकिङ भएको बताएको छ । अफरोड इलेक्ट्रिक एसयूभी उपलब्ध गराएर चर्चा कमाएको जेको जे६ मोडल भएकाले यसको स्टल अन्य भन्दा फरक थियो । त्यसैगरी पहिले देखि नै उपलब्ध ओमोडा ब्रान्ड आफैमा आकर्षणको केन्द्र थियो ।

अन्य ब्रान्डहरुले पनि प्रशस्तै बुकिङ गरेका छन् र यसको जानकारी सार्वजनिक गर्ने क्रम जारी राखेका छन् ।