नेपालमा बीएमडब्ल्यु गाडीको औपचारिक रुपमा बिक्री शुभारम्भ गरिने, सोरुमको भर्चुअल लन्च हुँदै

काठमाडौं – विश्व प्रसिद्ध अटोमोबाइल ब्रान्ड बीएमडब्ल्यु सोरुमको औपचारिक शुभारम्भ हुने भएको छ । नेपाली बजारका लागि आधिकारिक विक्रेताको रुपमा लक्ष्मी प्रिमियम मोटर्सले सोमबार एक कार्यक्रमका बीच यसको सोरुम भर्चुअल रुपमा शुभारम्भ गर्ने बताएको छ ।

हाल कोभिड–१९ संक्रमण हुने डरको समयमा विभिन्न कार्यहरु भर्चुअल रुपमा हुने गरेकोमा बीएमडब्ल्यु सोरुमको शुभारम्भ पनि त्यसै अनुसार गरिने कम्पनीको भनाइ छ । यससँगै नेपाली बजारमा बीएमडब्ल्यु गाडीको औपचारिक बिक्री प्रारम्भ हुनेछ । 

बीएमडब्ल्यु नेपालको अफिसियल फेसबुक पेज र युट्युब च्यानलबाट यसको प्रत्यक्ष प्रसारण गरिने छ ।

बीएमडब्ल्युको सोरुम राजधानीको तीनकुनेमा अवस्थित छ । यसका हाल दुई मोडलका गाडी एक्स५ र एक्स२ नेपाली बजारमा उपलब्ध भइसकेका छन् । यी गाडीको मूल्य क्रमशः ४ करोड ३० लाख र २ करोड रुपैयाँ तोकिएको बताइएको छ । 

लक्ष्मी प्रिमियम लक्ष्मी ग्रुप अन्तर्गतको कम्पनी हो । लक्ष्मी ग्रुप अन्तर्गतको लक्ष्मी इन्टरकन्टिनेन्टलले हाल नेपाली बजारमा हुन्डाईका गाडी समेत बिक्री–वितरण गरिरहेको छ ।