एथरको नयाँ इलेक्ट्रिक स्कुटर, घुँडासम्म पानी हुँदा पनि सजिलै चलाउन सकिने

एथर इनर्जीले चाँडै नै इलेक्ट्रिक स्कुटर रिज्टा लन्च गर्ने भएको छ । कम्पनीले हाल सो स्कुटरको परीक्षण गरिरहेको छ । हालै कम्पनीले यो स्कुटरको वाटर वेडिङ टेस्ट पनि गरेको छ ।

कम्पनीले सो इलेक्ट्रिक स्कुटर पानीमा परीक्षण गरेको थियो । यसको परीक्षणको भिडियो सामाजिक सञ्जालमा पनि शेयर गरिएको छ । जसलाई धेरैले रुचाएका पनि छन् । भिडियोका अनुसार स्कुटरलाई ४०० एमएम पानीमा परिक्षण गरिएको थियो । जसमा स्कुटर झण्डै आधा डुबेको देखिन्छ । यो अवधिमा स्कुटरमा कुनै प्रकारको समस्या आएको छैन ।

रिज्टा इलेक्ट्रिक स्कुटरको वाटर वेडिङ परीक्षणअघि कम्पनीले यसको ब्याट्री पनि परीक्षण गरेको थियो । कम्पनीले यसको ब्याट्री ४० फिटको उचाइबाट खसालेर परीक्षण गरेको थियो । यो परीक्षणमा पनि कम्पनीले सफलता हासिल गरेको छ ।

कम्पनीले सो इलेक्ट्रिक स्कुटरको बारेमा खास जानकारी खुलाएको छैन । तर एथरले रिज्टामा सेग्मेन्टमा सबैभन्दा ठूलो सिट र अन्डर सिट स्टोरेज भएको दाबी गरेको छ ।

कम्पनीले हाल २.९ किलोवाट र ३.७ किलोवाट क्षमताको ब्याट्री प्याक उत्पादन गर्छ । पहिलोले १११ किलोमिटरको रेन्ज प्रदान गर्छ भने दोस्रोले सिंगल चार्जमा १५० किलोमिटरको रेन्ज प्रदान गर्छ । कम्पनीले नयाँ स्कुटरमा यी दुई मध्ये एउटा विकल्प दिने अपेक्षा गरिएको छ ।

रिज्टा इलेक्ट्रिक स्कुटर कम्पनीले अप्रिल ६ मा लन्च गर्ने भएको छ । वाटर टेस्टको भिडियोसँगै कम्पनीले एथर रिज्टा आईपी ६७ रेटिङको ब्याट्री प्याकसहित अप्रिल ६ मा आउन तयार रहेको जानकारी दिएको छ ।