अमेरिकी ब्रान्डको नेपाली बजार : फ्लप बन्दै केही ब्रान्ड, आशा जगाउँदै जिप

अमेरिका विश्वको सबैभन्दा शक्तिशाली मुलुक हो । सबैभन्दा ठूलो अर्थतन्त्र भएको यो मुलुकको आर्थिक विकासमा प्रविधि र आधुनिक हातहतियारको विकासले मेरुदण्डको भूमिका निर्वाह गर्दै आइरहेको छ । प्रविधिको कुरा गर्दा सूचना प्रविधि र इन्जिनियरिङका क्षेत्रमा यो मुलुकले अभुतपूर्व सफलता हात पार्दै आइरहेको छ । त्यसैगरी अटोमोबाइल क्षेत्रको विकासले समेत यो मुलुकको आर्थिक विकासमा ठूलो योगदान दिँदै आइरहेको छ ।

विश्वका १० ठूला अटो ब्रान्डमा सूचिकृत फोर्ड र जनरल मोटर्स अमेरिकाका लागि मात्र नभई विश्वकै प्रख्यात अटोमोबाइल ब्रान्ड हुन् । जसमध्ये जनरल मोटर्स अन्तर्गतको सेभ्रोले ब्रान्डले कुनै समय नेपाली बजारमा राम्रै प्रभाव जमाउन सफल भएको थियो । भारतमा प्लान्ट स्थापना गरेर सवारी साधन उत्पादन गर्दै आइरहेको यो कम्पनीले एकाएक भारतबाट अलग हुने निर्णय गरेसँगै नेपालमा समेत सेभ्रोलेको आयात रोकियो । त्यसयता नेपालमा सभ्रोलेको कुनैपनि नयाँ मोडल आयात हुन सकिरहेको छैन । नयाँ मोडल आयात नभएपनि सेभ्रोलेका पुराना गाडीहरु नेपाली सडकमा अझैपनि गुडिरहेको देख्न सकिन्छ ।

सेभ्रोले नेपाल आयात हुन बन्द भएको करिब डेढ दशक बित्नै लाग्दा अहिले फेरि अर्को ठूलो ब्रान्ड फोर्डको बजार समेत अनिश्चित बनेको छ । जनरल मोटर्सले झै फोर्डले पनि भारतीय प्लान्ट बन्द गर्ने निर्णय गरेपछि यसको बजार अनिश्चित बनेको हो । यद्यपि नेपालस्थित आधिकारिक वितरक जीओ अटोमोबाइल्सले भने भारतीय प्लान्ट बन्द भएपनि तेस्रो मुलकबाट नयाँ मोडलका गाडी आयात गरी कारोबार सुचारु गर्ने प्रतिबद्धता जनाएको छ ।

नेपाली बजारमा हाल जापनिज, कोरियन, युरोपियन, भारतीय र चिनियाँ ब्रान्डले सफलता हात पार्दै गएपनि अमेरिकन ब्रान्डले भने खासै सफलता हात पार्न सकिरहेका छैनन् । यसअघि विश्वकै सबैभन्दा महंगो र हेभी मोटरसाइकलका रुपमा ख्याति कमाएको हार्ले डेभिड्सन समेत लामो समयसम्म टिक्न सकेन । यो ब्रान्डको समेत भारतमा उत्पादन बन्द भएपछि नेपालमा आयत रोकिएको हो । अर्को अमेरिकन ब्रान्ड युएमका मोटरसाइकल समेत केही समय कारोबार भएर पछि बन्द हुनु परेको थियो ।

ठूला अमेरिकन ब्रान्ड एकपछि अर्को असफल हुँदै गर्दा अर्को अमेरिकन ब्रान्ड जिपले भने नेपाली अटो पारखीको मन जित्न थालेको छ । नेपाल भित्रिएको ३ बर्ष अवधिमा यो अमेरिकन आइकनिक ब्रान्डमा नेपालका उद्यमी, व्यापारी र उच्च घरानाका ब्याक्तिहरु बढी आकर्षित हुन थालेपछि यसले अमेरिकन ब्रान्डको बजारलाई गति दिने आशा गरिएको छ ।

अफरोडर सेग्मेन्टमा संसारकै शक्तिशाली मानिने जिप ब्रान्डका एसयूभीमा नेपाली उपभोक्ताले रुचि बढाउन थालेपछि अहिले यो ब्रान्डको बजार समेत विस्तार हुँदै गैरहेको छ । नेपाली बजारमा जिपका ८४ लाख ९० हजार रुपैयाँदेखि २ करोड ८३ लाख ८० हजार रुपैयाँसम्म मूल्य पर्ने गाडीहरु उपलब्ध छन् । जिपलाई देशकै दोस्रो ठूलो अटोमोबाइल कम्पनी एमएडब्लु ग्रुप अन्तर्गतको लाइफ अटोमोबाइल्सले आयात गरी कारोबार गर्दै आइरहेको छ ।

विश्वको सबैभन्दा ठूलो ईभी निर्माता टेस्लाका इलेक्ट्रिक कार अनधिकृत माध्यमबाट नेपाल भित्रिएपनि हाल यो ब्रान्ड नेपाल भित्रिने बाटो बन्द भैसकेको छ । बिना आधिकारिक वितरक नेपालमा सवारी साधन भित्र्याउन नपाइने नियम र आधिकारिक वितरक नियुक्त गरी सवारीसाधन बिक्री नगर्ने टेस्लाको सिद्धान्तका कारण यो ब्रान्ड सम्भबतः अब नेपाल भित्रिने अवस्था देखिएको छैन ।