ललितपुरको कुसुन्तीमा बन्दै गरेको आकाशे पुल चर्चामा, के छ विशेषता ?

काठमाडौं - ललितपुरको कुसुन्तीमा पैदलयात्रीलाई सडक पार गर्न सहज बनाउने उद्देश्यले अत्याधुनिक आकाशे पुल निर्माण भइरहेको छ।

लिफ्ट सहितको यो पुल ज्येष्ठ नागरिक, अपांगता भएका व्यक्ति तथा बालबालिकालाई समेत सहज हुने गरी बनाइएको हो। तर निर्माण क्रममा विभिन्न प्राविधिक समस्या र प्रक्रियागत जटिलता आएपछि पुल निर्माण सम्पन्न गरी सञ्चालनमा ल्याउन ढिलाइ भएको छ। पुललाई छठ पर्वअघि वा त्यसलगत्तै सञ्चालनमा ल्याउने लक्ष्य राखिएको भए पनि उद्घाटनको निश्चित मिति भने सार्वजनिक गरिएको छैन।

ललितपुर महानगरपालिका–१३ स्थित चक्रपथ क्षेत्रमा निर्माण भइरहेको उक्त पुल करिब चार करोड ६८ लाख रुपैयाँ लागतमा निर्माण गरिएको हो। २०८० फागुनमा निर्माण सुरु गरिएको पुल सम्झौताअनुसार एक वर्षभित्र सम्पन्न गर्ने लक्ष्य राखिएको थियो। तर, प्राविधिक समस्या तथा निर्माण प्रक्रियामा देखिएका विभिन्न जटिलताका कारण निर्धारित समयमै निर्माण सम्पन्न हुन सकेन।

पुलमा दुवैतर्फ लिफ्टको व्यवस्था गरिएको छ। यसबाट विशेषगरी ज्येष्ठ नागरिक, अपाङ्गता भएका व्यक्ति, बिरामी तथा बालबालिकालाई सडक वारपार गर्न सहज हुने अपेक्षा गरिएको छ।

व्यस्त चक्रपथमा पैदलयात्रीलाई सुरक्षित रूपमा सडक वारपार गराउने र सम्भावित सडक दुर्घटनाको जोखिम न्यूनीकरण गर्ने उद्देश्यले पुल निर्माण गरिएको हो। लिफ्टसहितको संरचनाले शारीरिक रूपमा असहजता भएका व्यक्तिलाई समेत सडक पार गर्न सहज बनाउने विश्वास गरिएको छ।

निर्माण सम्पन्न भई सञ्चालनमा आएपछि कुसुन्ती हाइट तथा आसपासका क्षेत्रमा आवतजावत गर्ने पैदलयात्री लाभान्वित हुने अपेक्षा गरिएको छ। सार्वजनिक पूर्वाधारलाई थप पहुँचयोग्य बनाउने दृष्टिले पनि यो पुललाई महत्त्वपूर्ण रूपमा हेरिएको छ।

पुल सञ्चालनमा आएपछि कुसुन्ती क्षेत्रमा पैदलयात्रीलाई सडक पार गर्न सहज हुने र दुर्घटनाको जोखिम घटाउन मद्दत पुग्ने अपेक्षा गरिएको छ। खासगरी व्यस्त सडकमा सवारीसाधनको चापबीच बाटो काट्नुपर्ने बाध्यता कम गर्न यसले भूमिका खेल्न सक्छ।