रोयल इनफिल्ड क्लासिक ६५० हाइपरशिफ्ट सार्वजनिक, यस्तो छ मूल्य र विशेषता

काठमाडौं–रोयल इनफिल्डले आफ्नो १२५ औँ वार्षिकोत्सवको अवसर पारेर नयाँ क्लासिक ६५० हाइपरशिफ्ट बजारमा ल्याएको छ ।

यस विशेष मोडलको मूल्य ४ लाख २६ हजार भारु तोकिएको छ । विश्वका प्रमुख बजारहरूमा प्रत्येक क्षेत्रका लागि १२५ युनिट मात्र उपलब्ध हुने यो मोटरसाइकलले कम्पनीको लामो इतिहास र विरासतलाई झल्काउँछ ।

यसको बुकिङ अक्टोबर १६ देखि अक्टोबर २८ सम्म खुला गरिएको छ भने यसको डेलिभरी नोभेम्बर महिनादेखि सुरु हुने जनाइएको छ ।

नयाँ मोटरसाइकलको मेकानिकल पक्षमा भने कुनै फेरबदल गरिएको छैन र यसमा स्ट्यान्डर्ड क्लासिक ६५० कै इन्जिन प्रयोग गरिएको छ ।

यस मोटरसाइकलमा ६४८ सीसीको एयर–कुल्ड प्यारलल–ट्विन इन्जिन दिइएको छ जसले ४६ बीएचपी शक्ति र ५२.३ एनएम टर्क उत्पन्न गर्दछ ।

बाइकको मुख्य विशेषता यसको आकर्षक पेन्ट फिनिस हो, जुन प्रकाशको परिवर्तनसँगै रातो, हरियो र सुनौला रङहरूमा परिवर्तन भएको देखिन्छ । यसबाहेक यसमा गोल्डेन ब्रान्ड क्रस्ट, १२५ वर्षको विशेष ब्याजिङ, हातले पेन्ट गरिएको पिस्ट्राइप्स र क्विल्टेड लेदरको सिटजस्ता आकर्षक फिचर समवेश गरिएका छन् ।