जीडब्लूएमका दुई मोडल ओरा५ र ट्यांक ३०० लाई अन्तर्राष्ट्रिय अवार्ड

काठमाडौँ–चीनको प्रसिद्ध सवारीसाधन निर्माता कम्पनी जीडब्ल्यूएमका दुई लोकप्रिय मोडलहरूले प्रतिष्ठित अन्तर्राष्ट्रिय पुरस्कार जित्न सफल भएका छन् ।

सन् २०२६ को टोरिनो अटोमोटिभ डिजाइन अवाड्र्स (टीएडीए) मा जीडब्लूएमका विद्युतीय मोडल ओरा५ र प्रिमियम एसयूभी ट्यांक ३०० ले आ–आफ्नो विधामा उत्कृष्ट प्रदर्शन गर्दै सम्मानित भएका हुन् ।

टीएडीए २०२६ अन्तर्गत ओरा५ ले पारिवारिक कार विधामा ‘बेस्ट इन्टेरियर डिजाइन अवार्ड’ हासिल गरेको छ । आधुनिक प्रविधिसँगै दैनिक प्रयोगलाई सहज बनाउने उद्देश्यले निर्माण गरिएको ओरा५ को क्याविनमा प्रविधिमैत्री ककपिट, सहज कनेक्टिभिटी र आरामदायक यात्रालाई विशेष प्राथमिकता दिइएको छ ।

यस अवार्डले नयाँ पुस्ताका विद्युतीय सवारीमा स्टायल, व्यवहारिकता र प्रविधिको सन्तुलित संयोजनलाई अन्तर्राष्ट्रिय स्तरमै स्थापित गरेको छ ।

यसैगरी, प्रिमियम कार विधातर्फ जीडब्लूएमकै ट्यांक ३०० ले ‘बेस्ट टेक्नोलोजिकल इनोभेसन अवार्ड’ आफ्नो नाममा पारेको छ । जीडब्लूएमको ट्यांक ब्रान्डअन्तर्गत निर्मित यस एसयूभीले आधुनिक अफ–रोड प्रविधि, बलियो इन्जिनियरिङ र प्रिमियम सुविधाहरूको उत्कृष्ट नमुना पेश गर्छ । ट्यांक ३०० ले प्राप्त गरेको यो सम्मानले कम्पनीको उच्चस्तरीय एसयूभी उत्पादन क्षमता र प्रविधिगत नवप्रवर्तनलाई विश्वसामु थप उजागर गरेको छ ।

नेपालमा जीडब्लूएमको आधिकारिक वितरक भीजी इम्पेक्स प्रालिले नेपाली बजारमा शहरी विद्युतीय गाडीदेखि लिएर साहसिक यात्राका लागि सक्षम एसयूभीसम्मका विभिन्न मोडलहरू बिक्री–वितरण गर्दै आएको छ ।

कम्पनीका अनुसार यी दुई फरक मोडलहरूले पाएको अन्तर्राष्ट्रिय सम्मानले नेपाली ग्राहकहरूमा ब्रान्डको विश्वसनीयता थप्नुका साथै विश्वस्तरीय अटोमोटिभ प्रविधि र अत्याधुनिक डिजाइनको पहुँच बढाउन महत्वपूर्ण भूमिका खेल्नेछ ।