नयाँ रङ र स्पोर्टी लुक्समा आयो सुजुकी जिक्सर, मूल्य कति ?

काठमाडौँ–सुजुकीले युवा पुस्तामाझ निकै लोकप्रिय मानिएको आफ्नो जिक्सर बाइक सिरिजको अपडेटेड भर्सन भारतीय बजारमा सार्वजनिक गरेको छ ।

कम्पनीले १५५ सिसी र २५० सिसी दुवै भर्सनका मोडललाई नयाँ र आकर्षक रङको संयोजनसहित बजारमा उतारेको हो । यो नयाँ सिरिजको सुरुवाती मूल्य १ लाख ३७ हजार २२१ भारु निर्धारण गरिएको छ ।

कम्पनीका अनुसार बाइकको मुख्य इन्जिन तथा मेकानिकल बनावटमा कुनै परिवर्तन गरिएको छैन, तर सडकमा अझ बढी ध्यान खिच्नका लागि नयाँ ‘कलर स्किम’ थप गरिएको छ ।

१५५ सिसी क्षमताका जिक्सर र जिक्सर एसएफ अब मेटालिक ओर्ट ग्रे प्लस पर्ल बलेज अरेन्जको आकर्षक डुअल रङ संयोजनमा पाइनेछन् ।

त्यसैगरी, शक्तिशाली २५० सिसीका जिक्सर र जिक्सर एसएफ २५० मोडलहरू ग्लस स्पार्कल ब्ल्याक प्लस मेटालिक ओर्ट ग्रे रङमा उपलब्ध हुनेछन् भने एसएफ २५० एफएफभी भेरियन्ट भने क्लासिक ग्लस स्पार्कल ब्ल्याक अवतारमा बिक्रीका लागि खुला गरिएको छ ।

नयाँ अवतारमा आए पनि सुजुकीले जिक्सरको स्थापित पर्फर्मेन्सलाई निरन्तरता दिएको छ ।