बीपी राजमार्ग र कान्ति लोकपथमा रातिको यात्रामा रोक

काठमाडौँ — देशका विभिन्न भू–भागमा जारी अविरल वर्षासँगै बाढी तथा पहिरोको जोखिम उच्च बनेपछि काठमाडौँ उपत्यका जोड्ने प्रमुख राजमार्गहरूमा यात्रा कडाइ गरिएको छ ।

सुरक्षा जोखिमलाई ध्यानमा राख्दै नेपाल प्रहरीले बीपी राजमार्ग र कान्ति लोकपथमा रातिको समयमा सवारीसाधन सञ्चालनमा पूर्ण प्रतिबन्ध लगाएको छ ।

नेपाल प्रहरीका अनुसार काभ्रेपलाञ्चोक र सिन्धुली जोड्ने बीपी राजमार्गको खुर्कोट–नेपालथोक–कटुन्जेबेँसी खण्डमा बाढीको सम्भावित जोखिम रहेकाले अर्को सूचना जारी नभएसम्म बेलुका ६ः०० बजेदेखि बिहान ४ः०० बजेसम्म सबै किसिमका सवारीसाधन सञ्चालन गर्न पाइने छैन ।

त्यसैगरी मकवानपुरस्थित कान्ति लोकपथ खण्डमा पनि जोखिम कायमै रहेकाले अर्को व्यवस्था नभएसम्मका लागि बेलुका ५ः०० बजेदेखि बिहान ५ः०० बजेसम्म सवारी आवागमन पूर्ण रूपमा बन्द गरिएको प्रहरीले जनाएको छ ।