रातो नम्वर प्लेटका सवारीसाधनले अव राइड सेयरिङ गर्न नपाउने, आयकार समेत तिर्नुपर्ने

काठमाडौँ–सरकारले राइड सेयरिङमा प्रयोग हुने सवारीसाधनमा छुट्टै कालो नम्वर प्लेट राख्नुपर्ने व्यवस्था गरेको छ । बजेटमार्फत लागु गरिएको उक्त व्यवस्था कार्यन्वयनमा आएपछि रातो नम्बर प्लेट भएका मोटरसाइकलले राइड सेयरिङ गर्न नपाउने भएका छन् ।

दुई पाङ्ग्रे सवारी साधनलाई समेत भाडाको सवारी साधनका रूपमा दर्ता गर्ने व्यवस्था गरिएको हो । यसरी दर्ता हुने दुइपाङ्ग्रे सवारी साधनले ३ हजार रुपैयाँ वार्षिक आयाकर तिर्नुपर्ने व्यवस्था समेत गरिएको छ ।

हालसम्म रातो नम्बर प्लेट भएका मोटरसाइकल तथा स्कुटरले नै राइड सेयरिङ सेवा दिइरहेका छन् । सरकारको यो नियमसँगै अब यस्ता राइड सेयरहरू कालो नम्बर प्लेटमा दर्ता हुनुपर्ने भएको छ ।

त्यस्तै, सरकारले राइड सेयरिङबापत प्राप्त हुने प्रत्येक कारोबारमा ५ प्रतिशत करसमेत लाग्ने व्यवस्था गरेको छ ।