नेपालमा उबरको सेवा सुरु, राइड–सेयरिङ बजारमा नयाँ प्रतिस्पर्धा

विश्व चर्चित अमेरिकी राइड–हेलिङ कम्पनी उबरले नेपाली बजारमा आफ्नो सेवा अनौपचारिक रूपमा सुरु गरेको छ । कम्पनीले ६ जेठ २०८३ देखि काठमाडौं उपत्यकामा ‘टेस्ट लन्च’ मार्फत राइड–सेयरिङ सेवा सञ्चालनमा ल्याएको हो ।

नेपालमा आफ्नो सेवा विस्तारका लागि उबरले स्थानीय राइड–सेयरिङ कम्पनी ट्याक्सीमाण्डुसँग रणनीतिक साझेदारी गरेको छ । दुई कम्पनीबीच भएको सम्झौताअनुसार उबरले आफ्नो विश्वव्यापी रूपमा स्थापित एप र प्रविधि उपलब्ध गराउनेछ भने नेपालभित्रको सञ्चालन, चालक व्यवस्थापन र अनबोर्डिङको जिम्मा ट्याक्सीमाण्डुले सम्हाल्नेछ ।

हाल काठमाडौं उपत्यकामा यात्रुहरूले उबर एपमार्फत बाइक, कार तथा ट्याक्सी सेवा बुक गर्न सक्ने सुविधा पाएका छन् । केही दिनयता कम्पनीले चालक तथा यात्रु दर्ता प्रक्रिया तीव्र बनाएको थियो भने मंगलबार मात्रै उबरले आधिकारिक ईमेलमार्फत आफू काठमाडौंमा आइसकेको जानकारी दिएको थियो ।

उबरको आगमनसँगै नेपालको राइड–सेयरिङ बजारमा प्रतिस्पर्धा थप रोचक बन्ने देखिएको छ । यसअघि नै पठाओ, इन्ड्राइभ र याङगो जस्ता प्लेटफर्महरूले काठमाडौंमा बलियो उपस्थिति बनाइसकेका छन् । उबरले भने सुरुवाती चरणमै प्रतिस्पर्धी कम्पनीहरूको तुलनामा कम भाडादर देखाएर यात्रुको ध्यान तान्न थालेको छ ।

उदाहरणका रूपमा बुधबार साँझ नक्सालदेखि न्युरोड गेटसम्म मोटरसाइकल बुक गर्दा उबरमा ६७ रुपैयाँ भाडा देखिएको थियो । सोही दूरीका लागि इन्ड्राइभमा ९१ रुपैयाँ र पठाओमा १०९ रुपैयाँ देखिएको बताइएको छ । यात्रु आकर्षित गर्न कम्पनीले एपमार्फत १५ रुपैयाँ र ३० रुपैयाँसम्म छुट अफर पनि उपलब्ध गराउन थालेको छ ।

विशेषगरी नेपाल भ्रमणमा आउने विदेशी पर्यटकहरूका लागि उबरको सेवा उपयोगी बन्ने अपेक्षा गरिएको छ । विश्वका धेरै देशमा उबर प्रयोग गर्न अभ्यस्त पर्यटकहरूले अब काठमाडौंमा पनि सोही एपमार्फत सहज रूपमा राइड बुक गर्न सक्नेछन् ।

ट्याक्सीमाण्डुका अनुसार हाल चालक दर्ता र प्रविधि परीक्षणको काम जारी छ । योग्य ट्याक्सी तथा मोटरसाइकल चालकहरूले उबर चालक खाताका लागि आवेदन दिन सक्ने व्यवस्था गरिएको छ ।

सन् २००९ मा स्थापना भएको उबरले हाल विश्वका ७० भन्दा बढी देशका १० हजारभन्दा धेरै सहरमा सेवा दिँदै आएको छ । राइड–सेयरिङ बाहेक कम्पनीले उबर इट्स मार्फत खाना डेलिभरी तथा उबर फ्रेट्स मार्फत सामान ढुवानी सेवा पनि सञ्चालन गर्दै आएको छ ।

नेपालमा भने उबरले प्रारम्भिक चरणमा काठमाडौं उपत्यकामा मात्रै सेवा केन्द्रित गरेको छ । आगामी दिनमा देशका अन्य प्रमुख सहरमा समेत सेवा विस्तार गर्ने कम्पनीको तयारी रहेको बताइएको छ ।