भौतिक पूर्वाधार तथा यातायात मन्त्रालयको जिम्मेवारी सुनिल लम्साललाई

काठमाडौं - राष्ट्रिय स्वतन्त्र पार्टी (रास्वपा) ले बालेन्द्र शाह (बालेन) नेतृत्वको सरकारमा सुनिल लम्साललाई भौतिक पूर्वाधार तथा यातायात मन्त्री बनाउने निर्णय गरेको छ।

२०४७ असोजमा स्याङ्जाको बिरुवा गाउँपालिकामा जन्मेका लम्साल दुई दशकदेखि रूपन्देहीको तिलोत्तमा नगरपालिका भलबारीका स्थायी बासिन्दा हुन्। भलबारीकै बोर्डिङबाट एसएलसी पूरा गरेका उनले त्यहीको लुम्बिनी इन्जिनियरिङ कलेजमा पढे। एमाले निकट अनेरास्ववियूमा क्रियाशील रहेका उनी सन् २०११ मा त्यही कलेजमा स्ववियू सभापति निर्वाचित भए।

२०६२/६३ को जनआन्दोलनमा सक्रिय सहभागिता जनाएका लम्सालले संरचनात्मक इन्जिनियरका रूपमा राष्ट्रिय तथा अन्तर्राष्ट्रियस्तरका पूर्वाधार परियोजनामा काम गरिसकेका छन्।

२०७९ को स्थानीय निर्वाचनपछि उनले काठमाडौं महानगरपालिकामा मेयर बालेनको पूर्वाधार सल्लाहकार भएर काम गरे। फोहोर व्यवस्थापनलाई वैज्ञानिक, वातावरणीय र मानवअधिकारसँग सन्तुलन मिलाएर दीर्घकालीन समाधान खोज्नुपर्ने विषय ठान्ने उनी फोहोर व्यवस्थापनमा विद्यावारिधि गर्दैछन्।