१० लाख ६९ हजार भारुमै आयो कुशाक फेसलिफ्ट, यस्तो छ विशेषता

स्कोडाकाे आफ्नो वहुप्रतिक्षित एसयूभी कुशाक फेसलिफ्ट लन्च हुने भएको छ । एसयूभी क्लासिक+, सिग्नेचर, स्पोर्टलाइन, प्रेस्टिज र मोन्टे कार्लो गरी कुल ५ भेरिएन्टमा उपलब्ध हुनेछ, जसको सुरुवाती मूल्य १० लाख ६९ भाारु निर्धारण गरिएको छ । सबैभन्दा महंगो भेरिएन्टलाई भने १९ लाख भारु पर्ने जनाइएको छ ।

कुशाकमा अब नयाँ एलईडी हेडलाइट र डीआरएल तथा सेग्मेन्टेड एलईडी लाइट बारको साथ पुनः डिजाइन गरिएको ग्रिल समावेश गरिएको छ । अगाडिको बम्परलाई नयाँ स्किड प्लेटको साथ रि–वर्क गरिएको छ । त्यसैगरी रियरमा कुशाकमा केन्द्रमा एलुमिनेटेड `स्कोडा’ अक्षरको साथ कनेक्टेड एलईडी टेललाइट राखिएको छ ।

कुशाक फेसलिफ्टको इन्टेरियरमा गुगल जेमिनी एआई असिस्टेन्टको साथ नयाँ १०.१ इन्चको टचस्क्रिन इन्फोटेनमेन्ट सिस्टम, १०.२५ इन्चको डिजिटल इन्स्ट्रयुमेन्ट क्लस्टर र मसाज फंक्सन सहितको रियर सिट पाउन सकिन्छ । अन्य सुविधाहरूमा प्यानोरामिक सनरुफ, एम्बियन्ट लाइटिङ, ६ वे पावर्ड एड्जस्टेवल एन्ड भेन्टिलेटेड रियर सिट, फ्रन्ट पार्किङ सेन्सर, अटोमेटिक क्लाइमेट कन्ट्रोल, वायरलेस चार्जर र वायरलेस एन्ड्रोइड अटो तथा एप्पल कारप्ले उपलब्ध गराइएको छ ।

नयाँ कुशाकमा स्कोडाले उही परिचित १.० लिटर टर्बो–पेट्रोल इन्जिन जडान गरेको छ । एसयूभी ६ स्पिड म्यानुअल र नयाँ ८–स्पिड अटोमेटिक ट्रान्समिसनको साथ उपलब्ध हुनेछ । साथै, यसको उच्च भेरिएन्टमा भने ७ स्पिड डुअल क्लच अटोमेटिक गियरबक्ससँग जोडिएको १.५ लिटर टर्बो–पेट्रोल इन्जिन समेत विकल्पका रुपमा उपलब्ध हुनेछ ।

कुशाक नेपाली बजारमा समेत लोकप्रिय बनेको एसयूभी हो । स्कोडाको आधिकारिक वितरक एमएडब्लू ग्रुपले अबको केही सयमपछि यस नयाँ एसयूभीलाई नेपाल भित्र्याउन अपेक्षा गर्न सकिन्छ ।