प्रिन्ट भए १ हजार ६७३ लाइसेन्स, कागजातसहित उपस्थित हुन आग्रह

काठमाडौं–यातायात व्यवस्था विभागले हालै १ हजार ६७३ सवारी चालक अनुमतिपत्र (लाइसेन्स) छापिएको विवरण सार्वजनिक गरेको छ ।

विभागले यसवारे जानकारी सोमबार आफ्नो फेसबुक पेज ‘हेल्लो यातायात व्यवस्था विभाग’ मार्फत गराएको हो ।

छापिएका लाइसेन्स लिन आउने सबै व्यक्तिलाई सक्कल राजश्व तिरेको रसिद र पुरानो सवारी चालक अनुमतिपत्र लिएर उपस्थित हुन विभागले अनुरोध गरेको छ ।

पछिल्लो समयमा यातायात व्यवस्था विभागले आफूले छपाई गरेका लाइसेन्स विभागको फेसबुक पेज ‘हेल्लो यातायात व्यवस्था विभाग’मा प्रकाशित गरेर जानकारी दिदै आएको छ ।

विभागले जारी गरेको सूचनामा भनिएको छ, “सवारी चालक अनुमतिपत्र छपाइका लागि अनलाइन फारम भरी ‘एप्रुभ’ भएपश्चात ७२ घण्टाभित्र लाइसेन्स लिन आउनुहोला भन्ने जानकारी यसअघि प्रणाली ध्वस्त हुनुअघि आउने गरेको थियो । अब सुरक्षण मुद्रण केन्द्रबाट छपाइ सम्पन्न भई वितरणका लागि विभागमा प्राप्त भएका अनुमतिपत्रहरूको विवरण विभागको फेसबुक पेज ‘हेल्लो यातायात व्यवस्था विभाग’मा प्रकाशन गरिने छ।”

यसअघि यस्ता लाइसेन्सको जानकारी प्रणालीमार्फत ७२ घण्टाभित्र लाइसेन्स लिन आउनुहोला भनेर सन्देश पठाउने गरिएको थियो ।

जेनजी आन्दोलनमा उक्त प्रणाली ध्वस्त भएको थियो। फेसबुक पेजमा विवरणसहितको नाम समावेश भएको अवस्थामा आवेदनकहरु सक्कल राजस्व रसिद र पुरानो सवारी चालक अनुमतिपत्र लिई विभागमा उपस्थित हुन पनि विभागले अनुरोध गरेको छ ।