१,२०० रुपैयाँमै अब लक्जरी बसमा पोखरा–काठमाडौंको यात्रा

पोखरा – गण्डकी प्रदेशमै पहिलोपल्ट युरो सिक्स अर्थात बीएस६ मापदण्डको भल्वो आइसर ब्रान्डका लक्जरी बस चल्ने भएका छन् । भीई कमर्सियल भेइकलको नेपालका लागि आधिकारिक वितरकको रुपमा अटोवेज प्रालिले आयात गरेका ६ वटा बस स्विफ्ट होलिडेज प्रालिले सञ्चालनमा ल्याएको छ ।

अटोवेज प्रालिका अध्यक्ष नारायण पौडेलले स्विफ्ट होलिडेजका प्रबन्धक निर्देशक मिलन नेपाललाई बसको साँचो हस्तान्तरण गरे । प्रतियात्रु १ हजार २ सय रुपैयाँ भाडादरमा पोखरा–काठमाडौं र काठमाडौं–पोखरा रुटमा हाल ६ वटा बस सञ्चालन गरिएको छ ।

४० सिट क्षमताको यस गाडीले पोखरा–काठमाडौंको यात्रा समय घटाउने दाबी गरे । उनका अनुसार, ५ घण्टामै पोखराबाट काठमाडौं पुगिनेछ ।

प्रति बस करिब १ करोड ३० लाख रुपैयाँ मूल्यका यी बस राज्यको नीतिअनुसार १० वर्षसम्म बिक्री गर्न नपाउने र ४० सिटको मापदण्डमा आयात गरिएका हुन् । युरो सिक्स मापदण्डका यी सवारी साधनले कम उत्सर्जन, उन्नत इन्जिन प्रविधि र उच्च सुरक्षा सुविधा प्रदान गर्ने भएकाले नेपालको वातावरणमैत्री यातायातमा महत्त्वपूर्ण कदम भएको अटोवेजका अध्यक्ष नारायण पौडेलले बताए ।

स्विफ्ट होलिडेजका प्रबन्धक निर्देशक नेपालले कम्पनीको आठौं वर्षको अवसरमा यो बस भित्र्याएको जानकारी दिए । सन् २०१८ देखि काठमाडौं, पोखरा, चितवन र लुम्बिनीमा सेवा दिँदै आएको यस कम्पनीले अब दिवा र रात्रिकालीन सेवा विस्तार गर्ने योजना बनाएको छ ।

हाल करिब ४० वटा सवारी साधन सञ्चालन गर्दै आएको कम्पनीको फ्लिटमा टोयोटा कोस्टर, टोयोटा हायस, अशोक लेल्यान्ड र टाटा मोटर्सका सवारी साधन समेत रहेका छन् ।