रोयल इनफिल्ड मोटरसाइकलमा सवार ५ जना महिला राइडरले गरे मुस्ताङ सम्मको यात्रा

काठमाडौं–नेपालमा महिला राइडरलाई सशक्त बनाउने र साहसिक पर्यटन प्रवद्र्धन गर्ने उद्देश्यसहित आयोजना गरिएको ‘द मिस्टिक मुस्ताङ राइड’ सम्पन्न भएको छ ।

कात्तिक ७ देखी १२ गतेसम्म आयोजना भएको उक्त राइडमा पाँचजना प्रेरणादायी महिला राइडर सहभागी थिए । काठमाडौँदेखि मुस्ताङसम्मको ६ दिने उक्त राइडले रोमाञ्चक साहसिक कार्य, स्वतन्त्रता र सशक्तिकरणको भावनालाई प्रतिविम्बित गरेको आयोजक कम्पनी रोयल इन्फिल्ड नेपालले जनाएको छ ।

‘मिस्टिक मुस्ताङ राइड’ केवल एक साहसिक कार्य मात्र नभएर यो एक आन्दोलन समेत रहेको र यसले धेरै महिलाहरूलाई मोटरसाइकल चलाउन तथा खुला सडक अन्वेषणको आनन्द अनुभव गर्न प्रोत्साहित गरेको थियो । सो पहलमार्फत, रोयल इनफिल्डले महिला राइडरको बलियो समुदाय निर्माण गर्ने र मोटरसाइकल संस्कृति भित्र समावेशीतालाई बढावा दिने आफ्नो प्रतिबद्धता पुरा गरेको जनाइएको छ ।

मोटरसाकल राइडमा महिलाहरूलाई प्रवद्र्धन गर्नु बाहेक, यो अभियानले नेपालको परिदृश्यको सुन्दरतालाई उजागर गर्ने र घरेलु पर्यटनलाई प्रवद्र्धन गर्ने प्रयास समेत गरेको छ । घुमाउरो पहाडी सडकदेखि शान्त हिमालय दृश्यसम्मका विविध भूभागहरू पार गर्दै यो यात्राले नेपाललाई मोटरसाइकल उत्साही र यात्रुहरूका लागि विश्वस्तरीय गन्तव्यको रूपमा प्रस्तुत गरेको छ ।

‘मिस्टिक मुस्ताङ राइड’को सफल आयोजना मार्फत रोयल इनफिल्ड नेपालले महिला साहसिक राइडरको नयाँ पुस्तालाई प्रेरित गर्दै नेपाललाई दक्षिण एसियामा मोटरसाइकल पर्यटनको लागि एक अग्रणी केन्द्रको रूपमा स्थापित गर्न सफल भएको छ ।