भारतमा बीवाईडीको १० हजार बढी ग्राहक, बजार विस्तारले गति लिँदै

बीवाईडीले भारतमा आफ्नो बजार विस्तारलाई तिब्रता दिँदै आएको छ । कम्पनीले हालैमात्र आफ्नो १० हजार औं युनिट कार डेलिभरी गरेर भारतमा नयाँ माइलस्टोन हासिल गरेको छ , जुन चिनियाँ ईभी निर्माताका लागि नयाँ रेकर्ड समेत हो ।

२०२१ मा आफ्नो पहिलो मोडेल ई६ इलेक्ट्रिक एमपीभीलाई भारतिय बजारमा लन्च गरेको कम्पनीले हाल एट्टो३, ईम्याक्स७, सिल र सिलयान७ सहित विभिन्न मोडलहरु उपलब्ध गराउँदै आएको छ ।

भारतमा २०० मिलियन डलर भन्दा बढी लगानी गरेको बीवाईडीले हाल प्रमुख शहरहरूमा ४४ वटा डिलरशिप सञ्चालन गर्दै आएको छ । साथै, यसको १.४ लाख वर्ग मीटरमा फैलिएको फराकिलो एसेम्बली प्लान्ट समेत सञ्चालनमा छ ।

भारतमा १० हजार ग्राहकको माइलस्टोन हासिल गर्नु ठूलो उपलब्धी रहेको बीवाईडी इन्डियाका इलेक्ट्रिक प्यासेन्जर भेइकल बिजनस प्रमुख राजीव चौहानले बताए ।

‘यस उपलब्धीले बीवाईडीको सफा र ग्रिन मोबिलिटीको दृष्टिकोणप्रति बढ्दो विश्वास र उत्साहलाई प्रतिबिम्बित गर्दछ । हामीले सडकमा राखेका प्रत्येक सवारी साधनले उत्सर्जन घटाउँछ, ईभी प्रविधिलाई अगाडि बढाउँछ, र दिगो मोबिलिटी सिस्टमलाई बलियो बनाउँछ’ उनले भने ।