ईभी उत्पादनको केन्द्र बन्दै इन्डोनेसिया, ब्याट्री प्लान्टमा चीनको ठूलो लगानी

इन्डोनेसियालाई ईभी उत्पादनको केन्द्र बनाउने उद्देश्यका साथ चिनियाँ कम्पनीहरूले विशाल ब्याट्री कम्पनी निर्माणमा लगानी गरेका छन् ।

जर्काता ग्लोब सञ्चारमाध्यममा प्रकाशित खबरअनुसार, पश्चिम जाभाको कारावाङ क्षेत्रमा ब्याट्री प्लान्ट बनाइनेछ । सो विशाल प्लान्ट बनाउनका लागि ५.९ अर्ब डलर खर्च लाग्ने बताइएको छ ।

इन्डोनेसियाको खनिज उत्खनन कम्पनी अनेका ताम्बाङ, इन्डोनेसियन ब्याट्री कर्पोरेशन र चिनियाँ कम्पनीहरू कन्टेम्पोररी एम्पेरेक्स टेक्नोलोजी कम्पनी, ब्रन्प रिसाइक्लिङ र लिजेन्ड रिसोर्सेसको संयुक्त पहलमा प्लान्ट बनाउन लागिएको हो ।

उक्त प्लान्ट ३ हजार हेक्टर क्षेत्रफलमा हुनेछ र त्यसले ८ हजार रोजगारी सिर्जना गर्नेछ । यस परियोजना अन्तर्गत १८ वटा भौतिक पूर्वाधार निर्माण गरिनेछ । सामुद्रिक बन्दरगाहको निर्माण पनि त्यसै परियोजना अन्तर्गत बनाइनेछ ।

प्लान्ट निर्माण भएर सन् २०२६ को अन्त्यसम्ममा सञ्चालन हुने अपेक्षा गरिएको छ । अमेरिका र चीनबीच व्यापारयुद्ध चलिरहेको बेलामा चीनले दक्षिणपूर्वी एसियाका मुलुकहरूसँग मिलेर विकास र व्यापारमा व्यापक लगानी गरिरहेको छ ।