आज देशभरका यी राजमार्ग छन् अवरुद्ध

काठमाडाैं । वर्षा र पहिरोका कारण नेपालका विभिन्न राजमार्गहरू अवरुद्ध भएका छन् ।

ट्राफिक प्रहरी महाशाखाले दिएको जानकारी अनुसार संखुवासभाकाे भोटखोला गाउँपालिका-४ बरुणमा अविरल वर्षाका कारण कोशी राजमार्ग पूर्ण रुपमा अवरुद्ध छ ।

यसैगरी रसुवाकाे गोसाइँकुण्ड गाउँपालिका-२ मा नेपाल-चीन जोड्ने पुल र पासाङ ल्हामु राजमार्ग बाढीका कारण पूर्ण रुपमा अवरुद्ध भएको छ ।

गण्डकी प्रदेशमा बागलुङकाे बागलुङ नगरपालिका-१० डबल्याजमा पहिरोका कारण कालीगण्डकी करिडोर एकतर्फी रुपमा सञ्चालनमा छ । यस्तै गलकोट नगरपालिका-११ काउसेस्थित मध्यपहाडी लोकमार्ग पनि पहिरोका कारण एकतर्फी रुपमा खुलेको छ ।

गुल्मीकाे कालीगण्डकी गाउँपालिका-९ मसारेमा कालीगण्डकी करिडोर पहिरोका कारण एकतर्फी सञ्चालनमा छ भने कालीगण्डकी गाउँपालिका-४ बलबाकाे करिडोर पूर्ण रुपमा अवरुद्ध भएको छ ।

रोल्पाकाे परिवर्तन गाउँपालिका-३ भ्रामरमा शहीद राजमार्ग पहिरोका कारण एकतर्फी रुपमा सञ्चालनमा छ । प्युठानकाे प्युठान नगरपालिका-१० हादगैरास्थित बाम्दुला मध्यिक सडक खण्ड पहिरोका कारण एकतर्फी रुपमा मात्रै खुलेको छ ।

यसैगरी रुकुम पश्चिमकाे आठबिसकोट नगरपालिका-६ रिजिंगारमा जाजरकोट-डोल्पा भेरी करिडोर सडक खण्ड बाढीका कारण पूर्ण रुपमा अवरुद्ध छ । यता डोल्पाकाे त्रिपुरासुन्दरी नगरपालिका-९ छछातमा पनि भेरी करिडोर बाढीका कारण पूर्ण रुपमा अवरुद्ध छ ।