महिन्द्रा बीई६ र एक्सईभी ९ई हाईब्रिड पावरट्रेनमा पनि आउने

महिन्द्राले पछिल्लो समय लन्च गरेको नयाँ ईभी बीई६ र एक्सईभी ९ई हाईब्रिड पावरट्रेनमा पनि आउने भएको छ । मिडिया रिपोर्टका अनुसार, कार निर्माताले यी दुई नयाँ ईभीको रेन्ज–एक्सटेन्डर हाइब्रिड संस्करणहरू प्रस्तुत गर्ने योजना बनाएको हो ।

बीई६ र एक्सईभी ९ई इलेक्ट्रिक एसयुभीहरू ब्रान्डको ईंग्लो प्लेटफर्ममा आधारित छन् । सोहि प्लेटमफर्ममा आधारित आर्किटेक्चरमा पुनः इन्जिनियरिङ गरेर हाइब्रिड भर्सन ल्याउन लागिएको रिपोर्टमा उल्लेख गरिएको छ ।

रेन्ज–एक्सटेन्डर हाइब्रिड सेटअपमा १.२ लिटर पेट्रोल इन्जिन हुने जनाइएको छ । यसले ब्याट्री रिचार्ज गर्न जेनेरेटरको रूपमा काम गर्नेछ, जसले फलस्वरूप इलेक्ट्रिक मोटरहरूलाई पावर दिनेछ ।

मारुति सुजुकीले फ्रंक्स, बलेनो र स्विफ्ट जस्ता मोडेलहरूको लागि किफायती रेन्ज–एक्सटेन्डर हाइब्रिड पावरट्रेनमा काम थालेपछि महिन्द्राले पनि आफ्नो लाइनअपलाई हाइब्रिड भर्सनमा विस्तार गर्न लागेको हो ।