ठूलो आवाज निकाली ध्वनी प्रदूषण गर्ने मोटरसाइकल नियन्त्रणमा, सूचना दिन आग्रह

काठमाडौं – काठमाडौं उपत्यका ट्राफिक प्रहरी कार्यालयले विगत लामो समयदेखि स्वरुप परिवर्तन अर्थात मोडिफाई गरी ठुलो आवाज निकाली ध्वनी प्रदूषण गरी मोटरसाइकल चलाउने चालकहरुलाई कारवाही गर्दै आएको छ ।

यसै सन्दर्भमा पछिल्लो समय गत जेठ २० देखि २२ गते गरी तीन दिनको अवधिमा यस्ता ७६ मोटरसाइकल सहित चालकहरुलाई नियन्त्रणमा लिई यातायात व्यवस्था विभागमा कारवाहीको लागि पठाइएको बताएको छ ।

शहरी क्षेत्रमा हो–हल्ला गर्दै हिड्ने, ध्वनी प्रदूषण गर्ने, साइलेन्सर पाइपवाट आगोको झिल्का समेत निकाल्ने यस्ता मोटरसाइकलको वारेमा जानकारी दिन कार्यालयले अनुरोध गरेको छ ।

आफ्नो वडा एरियामा चलाएको देखेमा उक्त मोटरसाइकल नम्बर ट्राफिक प्रहरीको हटलाइन नम्बर १०३ र नेपाल प्रहरीको १०० नम्बरमा जानकारी गराई दिन समेत काठमाण्डौ उपत्यका ट्राफिक प्रहरी कार्यालयले अनुरोध गरेको छ ।

यसरी दिइएको जानकारीलाई गोप्य राखिने समेत कार्यालयले बताएको छ ।