ईभीएक्स लन्च हुनु अगाबै २५ हजार चार्जिङ स्टेशन तयार पार्ने योजनामा मारुती सुजुकी

भारतको सबैभन्दा ठूलो कार उत्पादक मारुती सुजुकीले आफ्नो पहिलो ईभी लन्च गर्ने तयारीलाई अन्तिम चरणमा पुर्याएको छ । २०२५ को सुरुवातमै पहिलो ईभी मोडल ईभीएक्स लन्च गर्ने योजना बनाएको कम्पनीले त्यस अगावै भारतभर २५ हजारभन्दा बढी चार्जिङ पूर्बाधार तयार पार्ने योजनामा समेत काम गरिरहेको छ ।

चार्जिङ पूर्बाधार विस्तार गर्न मारुती सुजुकीले भारतका आयल मार्केटिङ कम्पनी र विभिन्न इनर्जी कम्पनीसंग सहकार्य गर्ने योजना बनाएको हो । मिडिया रिपोर्टका अनुसार कम्पनीले अहिले भारतभर रहेका डिलर नेटवर्कसंग समेत यस विषयमा छलफल अघि बढाएको छ ।

हाल संचालनमा रहेका सर्भिस सेन्टरमा ईभीका लागि कम्तिमा पनि एउटा छुट्टै सर्भिस वे र दुईवटा चार्जिङ प्वाइन्टलाई अनिबार्य गर्ने पनि उसको योजना छ । कम्पनीले अहिले आफ्ना मेकानिक्सलाई ईभी सम्वन्धि तालिम समेत प्रदान गर्न थालिसकेको रिपोर्टमा उल्लेख छ ।

मारुती सुजुकीले गुजरातस्थित प्लान्टबाट ईभीएक्स उत्पादन गर्ने तयारी गरेको छ । आफ्नो पहिलो ईभी मोडल ईभीएक्सलाई उसले पहिलो तीन महिनासम्म मासिक ३ हजार यूनिटका दरले बिक्री गर्ने योजना बनाएको छ ।

ईभीएक्सको मूल्य २० देखी २५ लाख भारुको विचमा कायम हुने अनुमान गरिएको छ । भारतमा हाल टाटा, महिन्द्रा, सिट्रोन र एमजीले ईभी उत्पादन गर्दै आएका छन् ।