नेपाल नआउँदै २५ युनिट एमटी ४५० बुकिङ भएको थियो : उज्वल जोशीसँग कुराकानी

हालै सम्पन्न अटो शोमा हामीले प्रिमियम टु ह्विलर ब्रान्ड सिएफ मोटोको एमटी ४५० र सोही कम्पनी अन्तर्गतको इलेक्ट्रिक स्कुटर जिहोको एई ४ लन्च गरेका थियौँ । हामीले लन्च गरेको नयाँ स्कुटर एविएस र नन् एबिएस भर्सनमा उपलब्ध छ । यी दुईवटै बाइकमा दर्शकको आकर्षण निकै राम्रो रह्यो ।

एमटी ४५० को कुरा गर्नुपर्दा यो मोटरसाइकल ५ महिना अघिमात्र फिलिपिन्स्मा पहिलोपटक लन्च भएको हो । अन्तर्राष्ट्रिय बजारमा लन्च भएलगत्तै यो नयाँ मोटरसाइकल नेपाल नआउँदै २५ युनिट बुकिङ भएको थियो । नाडाको पहिलो दिनमा थप बुकिङ लिएर हामीले यसको पहिलो लटका लागि बुकिङ क्लोज गरेका छौं भने दोस्रो लट अक्टोबरमा डेलिभरी दिने गरी पुनः बुकिङ खुलाएका छौ ।

सिएफ मोटो एमटी ४५० मा ४४९.५ सीसीको बलियो, लिक्विड कुल्ड, प्यारलल–ट्विन अथवा डुअल सिलिन्डर इन्जिन जडान गरिएको छ, जसले ४४ एचपी पावर र ४४ एनएम टर्क जेनेरेट गर्छ । सीएफमोटोले ४५० एमटीलाई सुरक्षा र सुविधाका उत्कृष्ट सुविधाहरूले सुसज्जित गरेको छ । बाइकमा पूर्ण रूपमा डिजिटल ६ इन्च फराकिलो टीएफटी डिस्प्ले छ । मोटरसाइकलमा आकर्षक डिजाइन र कार्यक्षमताको उत्कृष्ट संयोजन रहेको छ ।

यसमा बोस ट्र्याक्सन कन्ट्रोल सिस्टम, फोल्डेबल रियर–भ्यू मिरर्स, एडजस्ट गर्न मिल्ने विन्डशिल्ड र केवाईबी सस्पेन्सन रहेको छ । बाइकमा एर्गोनोमिकली डिजाइन गरिएको सिट छ । बाइकको विन्डस्क्रिनले हावाको प्रतिरोध घटाएर लामो यात्रामा थकान निकै नै कम गर्छ । १७ लिटरको ठूलो फ्युल ट्यांकले रिफ्युलिङ बिना नै लामो दूरी यात्रा गर्न सम्भव बनाउँछ ।

बाइकको २२० एमएम ग्राउन्ड क्लियरेन्सका साथै फ्रन्ट टायरको टेलिस्कोपिक फोर्क र पछाडिको टायरको मोनोशकले जस्तोसुकै भूभागमा पनि आरामदायी यात्रा सुनिश्चित गर्छ । एड्भेन्चर सेग्मेन्टमा सबैभन्दा पावरफुल मोटरसाइकल भएपनि हामीले यसको मूल्य जम्मा १२ लाख ५० हजार रुपैयाँ मात्र कायम गरेका छौ ।