तपाई मोटरसाइकल/स्कुटर चलाउनु हुन्छ ? यी १७ कुरामा ध्यान दिनुहोस्

नेपाल अटो
८ भदौ, २०८१

तपाई हामी अधिकांशको यात्रा सहयात्री मोटरसाइकल/स्कुटर नै हो भन्दा सायद अत्युक्ति नहोला । चित्ताकर्षक डिजाइन, उच्चतम गति, मूल्य तथा प्रविधिको कारणले गर्दा यी मोटरसाइकल/स्कुटर लोकप्रिय बनेका हुन् । सडकमा गुड्ने संख्याका आधारमा होस् अथवा सडकमा हुने सवारी दुर्घटनामा संलग्न सवारी साधनको संख्यात्मक रुपमा नै किन नहोस् यी दुबैमा मोटरसाइकल/स्कुटर अग्रपंक्तिमा छ । तसर्थ तपाई हामी मोटरसाइकल/स्कुटरमा यात्राका बखत अझै सम्वेदनशील र गम्भीर हुनुपर्ने देखिन्छ ।

तपाई पनि मोटरसाइकल/स्कुटर चलाउँदा निम्न कुराहरुमा ध्यान दिनुहोस् है ।

यात्रामा निस्कनु अगाडि मोटरसाइकल/स्कुटरको अवस्था जस्तै ब्रेक, टायर र हावाको अवस्था, लुकिङ्ग ग्लास, साइडलाइट, हेड लाइट, न्युट्रल लाइट, बीम लाइट, फ्युल मिटर, स्पिडोमिटर, बिभिन्न नट तथा बोल्टहरु, क्लच तथा क्लच तार आदिको राम्रोसँग चेकजाँच गर्नुहोस् ।
मोटरसाइकल/स्कुटरको स्ट्याण्ड झारेको/डाउन गरेको छ छैन याद गर्नुहोस् ।
मोटरसाइकल/स्कुटरको ब्रेक लगाउँदा (६०–४०) को शुत्रलाई याद गर्नुहोस् अर्थात ब्रेक लगाउँदा पछाडिको ब्रेकमा ६० प्रतिशत तथा अगाडिको ब्रेकमा ४० प्रतिशत बल प्रयोग गर्नुहोस् ।
मोटरसाइकल/स्कुटर चलाउँदा दुबै हातले ह्यान्डल राम्रोसँग समात्नुहोस् जसले गर्दा आवश्यक परेको बेलामा सुरक्षित साथ रोक्न तथा नियन्त्रणमा राख्न सकिन्छ ।
दुबै घुँडालाई फ्युल ट्यांकी नजिक राख्नुहोस्, जसले मोटरसाइकल सन्तुलित अवस्थामा राख्न सहयोग पुग्छ ।
मादक पदार्थ तथा लागु औषध सेवन गरेर मोटरसाइकल/स्कुटर नचलाउनुहोस् ।
हतारमा तथा तीव्र गतिमा, अत्यधिक खुसी तथा तनाव र अनिदो अवस्थामा सवारी साधन नचलाउनुहोस् ।
सदैव सडकमा ध्यान केन्द्रित गरेर मोटरसाइकल/स्कुटर चलाउनुहोस् ।
गुणस्तरीय हेल्मेटको प्रयोग गर्नुहोस र हेल्मेटको फित्ता सधै बाध्नुहोस् । कान दुख्ने गरी साँघुरो तथा हल्लिने गरी खुकुलो हेल्मेटको प्रयोग नगर्नुहोस् ।
मोटरसाइकल/स्कुटर चलाउँदा मोबाइल फोनमा कुराकानी नगर्नुहोस्, गर्नै पर्ने भए सडक किनारामा रोकेर मात्र कुराकानी गर्नुहोस् ।
आफूभन्दा अगाडिको सवारी साधनसँग ब्रेकिङ डिस्टेन्स अर्थात सुरक्षित दुरी कायम राख्नुहोस् ।
अन्य सवारी चालक तथा पैदल यात्रुप्रति आदर भाव राख्नुहोस् ।
साइरन बजाउँदै आएको दमकल, एम्बुलेन्स, प्रहरीको सवारी साधनलाई, त्यस्तै शाखा सडकबाट मुख्य सडकतर्फ अगाडि बढ्दा मुख्य सडकमा चलिरहेको सवारी साधनलाई प्राथमिकता दिने बानी बसाल्नुहोस् ।
दाँया वा बायाँ मोड्दा पछाडिको चालकलाई समयमा नै साइड लाइटको प्रयोग मार्फत संकेत गर्नुहोस् ।
असुरक्षित स्थान तथा बायाँ साइडबाट कहिल्यै ओभरटेक नगर्नुहोस् ।
आफ्नो साथमा जहिल्यै सवारी चालक अनुमति पत्र र सवारी दर्ता किताब साथमा राख्नुहोस् साथै आकस्मिक मोबाइल नम्बर, ठेगाना, आफन्तजनको नम्बर, रक्त समुह लगायतका अद्यावधिक विवरणहरु राख्नुहोस् ।
पार्किङ्ग गर्दा एकान्त स्थानमा पार्किङ्ग नगर्नुहोस, सधै सुरक्षित स्थानमा मात्र पार्किङ्ग गर्नुहोस् र पार्किङ्गका बखत ह्विल लक, चेन लक, ह्यान्डल लक, डिस्कलक, सुरक्षा साइरनहरु जडान गर्नुहोस् ।