अटो शो र फेस्टिभ सिजनको पूर्वसन्ध्यामा सहरमा बढ्दै शोरुम, भित्रिदै नयाँ ब्रान्ड

आगामी भाद्र ११ देखि अटोमोबाइल व्यवसायीहरुको लागि चाडपर्वकै रुप मानिने नाडा अटो शो २०२४ शुरु हुँदैछ । अटो शोमा नयाँ ब्रान्ड र नयाँ मोडल प्रदर्शन गरिने पहिले देखिकै चलन हो । यो वर्ष विशेष गरी नयाँ ईभी ब्रान्ड भित्रिने लहर नै चलेको छ र ती ब्रान्डका उत्पादन पनि प्रदर्शन गर्ने तयारीमा व्यवसायीहरु रहेका छन् ।

यही मेसोमा काठमाडौं उपत्यकाका विभिन्न स्थानमा नयाँ शोरुम खुल्ने क्रम पनि चलिरहेको छ । विभिन्न स्थानमा शोरुमको सजावट चलिरहेको देख्न सकिन्छ । अटोमोबाइल हब मानिने थापाथली, नक्साल, बालुवाटार, टेकु आदि स्थानमा यस्ता शोरुम सजावटको तयारी भइरहेको छ । यसका साथमा ‘कमिङ सुन’ लेखेर आफ्नो ब्रान्ड प्रवद्र्धन गर्ने अभियान पनि चलिरहेको छ ।

नेपालमा भित्रिने नयाँ ब्रान्ड जिकरको शोरुम थापाथलीमा खुल्दै छ । जिकर ब्रान्ड पहिलो पटक नेपाल भित्रिदै छ । नेपालका लागि आधिकारिक वितरक पायोनियर मोटोकर्पले जिकर एक्स नेपाली बजारमा उपलब्ध गराउने बताएको छ । यसको मूल्य समेत सार्वजनिक भइसकेको छ । रियर ह्विल र अल ह्विल ड्राइभमा उपलब्ध हुने जिकर एक्सको मूल्य क्रमशः ९० लाख र १ करोड ६० लाख पर्ने जनाइएको छ ।

थापाथलीमा अवस्थित फोर्ड शोरुमसँगै नयाँ ब्रान्ड काईको शोरुम पनि तयार हुँदैछ । काई एक्स३ प्रो नेपाली बजारमा उपलब्ध हुनेछ । गोल्छा ग्रुप अन्तर्गतको जिओ अटोमोबाइल्सले सो ब्रान्डका गाडीका लागि शोरुम तयार गरेको हो । यही ब्रान्ड एलआरआर ग्रुप र लक्ष्मी ई–मोबिलिटीले समेत ल्याउने घोषणा गरिसकेका छन् ।

सीजी मोटर्सले स्मार्ट, एक्सपेङ र अवतार लगायतका विभिन्न नयाँ ब्रान्ड नेपाली बजारमा भित्र्याएको छ । यसको शोरुम पनि थापाथलीमा भव्य रुपमा तयार हुँदैछ । थापाथलीको मुख्य चोक नजिकै सीजी मोटर्सले यी वाहेक अन्य ब्रान्डलाई समेत समेट्दै छ ।

नेपाली बजारमा उपलब्ध हुने अर्को ब्रान्ड एलएस अटोको शोरुम बालुवाटारमा निर्माण हुँदैछ । वेबर ग्रुप अन्तर्गतको नेक्सन भेन्चर्स प्रालिले विश्वको प्रतिष्ठित डिजाइन हाउस सांघाई लन्च अटोमोटिभको पहिलो प्रिमियम एसयूभी एलईभी ०१ नेपाली बजारमा उपलब्ध गराउने बताएको छ ।