नयाँ ड्यूक २५०, यी हुन् थप भएका फिचर

केटिएम ड्यूक २५० नयाँ भर्सनमा आएको छ । नयाँ मोटरसाइकलमा केटिएमले नयाँ चेसिस र नयाँ इन्जिन दिनुको साथै अन्य थुप्रै फिचर समेत थप गरेको छ । पुरानो मोडलभन्दा ५ हजार रुपैयाँमात्र बढेर आएको नयाँ भर्सनको मूल्य ७ लाख ४० हजार रुपैयाँ निर्धारण गरिएको छ ।

केटिएमको नेपालका लागि आधिकारिक वितरक हंसराज हुलासचन्द एण्ड कम्पनीले लन्च भएकै दिन ५० वटा नयाँ ड्यूक ग्राहकलाई हस्तान्तरण गरेर यसको बिक्री सुरु गरेको हो ।

नयाँ ड्यूक २५० मा कम्पनीले नयाँ इन्जिन सेटअप दिएको छ । यसअघि डिओएचसी सेटअप रहेकोमा नयाँ मोडलमा एसओएचसी सेटअप दिइएको हो । नयाँ इन्जिन सेटअपसंगै पावर र टर्क समेत बढेर आएको छ । बाइकमा जडान गरिएको २४९.०७ सिसी क्षमताको बिएस६ इन्जिनले ३१ पीएस पावर र २५ एनएम टर्क जेनेरेट गर्दछ । पुरानो ड्यूक २५० को अधिकतम पावर ३० पिएस र टर्क २४ एनएम रहेको थियो ।

६ स्पिड गियरवक्स जडान गरिएको बाइकलाई १४८ किलोमिटर प्रतिघण्टाको उच्चतम गतिमा हाँक्न सकिने दाबी छ । नयाँ ड्यूक २५० मा पुरानो मोडलको तुलनमा १.५ लिटर पेट्रोल बढी अट्ने फ्यूल ट्यांक दिइएको छ । १५ लिटर क्षमताको फ्यूल ट्यांक जडान गरिएको बाइकले प्रतिलिटर ३५ किलोमिटर माइलेज दिने कम्पनी दावी छ ।

नयाँ मोडलमा ग्राउन्ड क्लिरियन्स भने घटेर आएको छ । पुरानो मोडलको ग्राउन्ड क्लिरियन्स १८५ एमएम रहेकोमा नयाँ ड्यूक २५० मा भने जम्मा १७६ एमएम मात्र छ । साथै नयाँ बाइकको तौल समेत १६९ किलोग्रामबाट घटेर १६२.८ किलोग्राम पुगेको छ ।

नयाँ ड्यूक २५० मा केटिएमले पूर्णत एलइडी लाइट, एलसिडी डिस्प्ले, डुअल च्यानल एबिएस, अन्डलबेली एक्जस्ट, एल्मुनियम बनाना स्विंगआर्म, स्लिपर क्लच र क्विक सिफ्टर प्लस लगायत फिचर दिएको छ ।