मारुती सुजुकीको पहिलो इलेक्ट्रिक एसयूभी २०२५ मार्चमा लन्च हुने

मारुती सुजुकीले आफ्नो पहिलो इलेक्ट्रिक एसयूभी ईभिएक्स २०२५ को मार्च महिनामा लन्च गर्ने भएको छ । सो नयाँ ईभीलाई कम्पनीले अहिले भारतका विभिन्न सडकमा परिक्षण गरिरहेको छ ।

भारतको सबैभन्दा ठूलो अटो उत्पादक मारुती सुजुकीले आफ्नो पहिलो ईभी कहिले लन्च गर्ला भन्ने जिज्ञासा विश्वभरका ईभी पारखीमाझ रहँदै आएको थियो ।

सुजुकी ईभिएक्ससंगै तयार भइरहेको टोयोटाको नयाँ ईभी पनि लगत्तै लन्च हुने कम्पनीले जनाएको छ । भारतमा अहिले यी दुई कम्पनीविच सहकार्य हुँदै आएको छ । ईभीका लागी यी दुई ब्राण्ड मिलेर नयाँ प्लेटफर्म समेत विकास गरिरहेका छन् ।

मास मार्केटलाई लक्षित गरी बजेट ईभी ल्याउन यी दुई कम्पनीले २७ पिएल स्केटबोर्ड प्लेटफर्म विकास गरेका हुन् । सोही प्लेटफर्ममा नै सुजुकी ईभिएक्स उत्पादन हुनेछ । मारुती सुजुकी इण्डियाका कार्यकारी निर्देशक राहुल भारतीका अनुसार ईभीएक्समा जडान हुने ६० किलोवाट आवरको ब्याट्रीले सिंगल चार्जमा ५५० किलोमिटर रेन्ज प्रदान गर्नेछ ।

‘ईभीका लागी हामीले छुट्टै प्लान्टको निर्माण समेत थालिसकेका छौ । अवको बजार ईभीमै केन्द्रित हुनेहुँदा मारुती सुजुकीले पनि आफ्नो लाइनअपमा थुप्रै मोडलका इलेक्ट्रिक कार लन्च गर्ने योजना बनाइरहेको छ’ उनले भने ।