सीईओ क्षेत्री भन्छन् : मोटरसाइकल र स्कुटर खरिद गर्ने ग्राहक नै नभएका हुन् कि जस्तो भएको छ

१५० सीसी माथिका बाइकमा सरकारले लगाएको आयात प्रतिबन्ध यही पुस १ गतेबाट हटेको छ । प्रतिबन्ध हटेसँगै विगत ८ महिनायता नेपाल आउन नपाएका यस्ता मोटरसाइकल भित्र्याउने तयारीमा व्यवसायी जुटेका छन् । आयात खुल्ला भएपनि बजारमा तरलताको अभाव र चर्को ब्याजदरका कारण तत्कालै बजार पुरानै लयमा फर्कने विषयमा भने उनीहरु शशंकित देखिन्छन् । मन्दीको अवस्थाबाट गुज्रिरहेको अर्थतन्त्रका वावजुद आगामी दिनमा दुई पाङ्ग्रे सवारीको बजार कस्तो रहला भन्ने विषयमा नेपाल अटोले यामाहा मोटरसाइकलको नेपालका लागि आधिकारिक वितरक एमएडब्लु इन्टरप्राइजेजका सीईओ राजु क्षेत्रीसँग कुराकानी गरेको छ । प्रस्तुत छ उनीसँग गरिएको कुराकानीको सारसंक्षेप :

१५० सीसी माथिका मोटरसाइकलको आयातमा लगाइएको प्रतिवन्धले दुई पाङ्ग्रे सवारीको बजारमा कस्तो प्रभाव पा-यो ?
प्रतिबन्धका कारण ८ महिनासम्म हामीले १५० सीसी माथिका मोटरसाइकल तथा स्कुटर आयात गर्न पाएनौ । यसले पक्कै पनि यो सेग्मेन्टको बजारलाई नराम्रो असर त पा-यो नै, साथसाथै यो समयमा १५० सीसीसम्मका बाइकको बिक्री समेत प्रभावित वन्यो । अहिले समग्र टु ह्विलरको बजार खस्किएको छ । यसमा तरलताको अभाव, अटो लोनमा गरिएको कडाई र ब्याजदर वृद्धिजस्ता विषय प्रमुख कारण रहे । अहिले बजारमा नयाँ मोटरसाइकल तथा स्कुटर किन्ने ग्राहक नै नभएका हुन् कि भनेर सोच्ने अवस्थामा पुगिसकेका छौ हामी ।

सरकारले आयात खुल्ला गरेपनि अन्य समस्याहरु जहाँको तहिँ रहेको अवस्था छ । यस्तोमा आगामी दिनमा टु ह्विलरको बजार कसरी अघि वढ्ला ?
अहिले अर्थतन्त्रमा चौतर्फी चुनौतीहरु देखा परिरहेका छन् । यसले अटोमोबाइलको बजारलाई मात्र नभएर समग्र अर्थतन्त्रलाई नै असर पारिरहेको छ । अटोमोबाइल क्षेत्रको कुरा गर्नुपर्दा अहिले सवारी साधनको मात्र नभएर सर्भिस सेन्टरदेखि स्पेयर पार्ट्स र रिकिन्डसन बजार सम्मको कारोवार कम भइरहेको छ । देशको अर्थतन्त्रमाथि नै चुनौती देखिएका कारण यो समस्या तत्कालै समाधान होला जस्तो मलाई लाग्दैन ।

अघिल्ला दुई आर्थिक वर्षको बिक्रीलाई हेर्ने हो भने २०७७/७८ मा कुल ३ लाख ५० हजार हाराहारी यस्ता साधन नेपाल भित्रिए । अघिल्लो आर्थिक वर्षमा यो झरेर २ लाख ७२ हजार हाराहारीमा पुग्यो । यो आर्थिक वर्षको ५ महिनामा आयात भएको संख्यालाई हेर्दा यो वर्ष १ लाख ५० हजार पनि पुग्न मुस्किल हुने देखिन्छ ।

मंसिर महिनामा सवै ब्रान्डको गरेर जम्मा ६ हजार २०० युनिट मात्र मोटरसाइकल तथा स्कुटर आयात भएका छन् । जवकी अघिल्ला आर्थिक वर्षको एक महिनामा एउटै ब्रान्डले सो भन्दा बढी संख्यामा मोटरसाइकल मगाउँदै आएका थिए । आयातको यस्तो निराशाजनक तथ्यांकले आगामी दिन निकै चुनौतीपूर्ण हुने देख्छु ।

नागरिकका लागि अत्यावश्यक जस्तै वनेको मोटरसाइकल तथा स्कुटरको बिक्री घट्नुमा अन्य कारण पनि जिम्मेवार छन् कि ?
तरलताको अभावसँगै शुरु भएको यो समस्यामा पछि गएर ब्याजदर समेत वृद्धि हुँदा ग्राहकले भुक्तानी गर्नुपर्ने किस्ता रकम समेत महंगो पर्न गयो । एक वर्षअघिसम्म ९ प्रतिशत हाराहारी ब्याजदरमा कर्जा लिएर बाइक खरिद गरेका ग्राहकले अहिले १७ प्रतिशतसम्म ब्याज तिर्नु परेको छ । ब्याजदर बढ्दा स्वभाविक रुपमा मासिक किस्ता वढ्ने नै भयो । मन्दीका कारण कमाई गुमाउनुको पिडासँगै किस्ता समेत बढ्ने भएपछि अहिले अधिकांश ग्राहकले सवारीसाधन खरिदमा चासो दिन छाडेका छन् ।

बाइकको बिक्री त कम छ नै, साथमा सर्भिस सेन्टरको काम समेत ५० प्रतिशत भन्दा कमले घट्दा डिलरहरु साँच्चिकै मारमा परेका छन् ।

अर्को तर्फ कोभिडका कारण विदेश जान रोकिएका युवाहरुको ठूलो जमात अहिले धमाधम उडिरहेका छन् । कोभिडको समयमा वाहिर जान नपाएका कारण ठूलो संख्यामा युवाहरु स्वदेशमै रोकिनु परेको थियो । सो समय उहाँहरुले मोटरसाइकल र स्कुटर खरिद गरेकै कारण टु ह्विलरको बजारले कीर्तिमानी रेकर्ड कायम राख्दै ३ लाख ५० हजारसम्म पुग्यो । तर अहिले तिनै युवाहरु धमाधम आफूसँग भएको पुरानो मोटरसाइकल तथा स्कुटरलाई सस्तो मूल्यमै रिकिन्डसन बजारमा बिक्री गरेर बाहिर गइरहेका छन् । यसले गर्दा पनि हाम्रो बजार कम भएको हो भन्ने मलाई लाग्छ । बाइकको बिक्री कम हुनुमा वढ्दै गइरहेको राइड सेयरिङ कल्चरले पनि भूमिका खेले जस्तो लाग्छ ।

बिक्री कम भएका कारण आयातकर्ता कम्पनीसँगै डिलर संचालकहरु पनि मारमा पर्न थालेका छन् । उनीहरुको व्यवसाय टिकाउने वारेमा चाहिँ कम्पनीले के सोचेको छ ?
यामाहाको हकमा भन्नुपर्दा अहिले हाम्रो देशभर १०९ वटा डिलर संचालनमा छ । हामी जस्तो समस्यमा छौ, उहाँहरुको समस्या झनै ठूलो छ । अहिलेकै बिक्री अनुपातलाई हेर्दा हामीले ती डिलरलाई कसरी टिकाइराख्ने भन्ने चुनौती थपिएको छ । बाइकको बिक्री त कम छ नै, साथमा सर्भिस सेन्टरको काम समेत ५० प्रतिशत भन्दा कमले घट्दा डिलरहरु साँच्चिकै मारमा परेका छन् । अवस्था यस्तै रहने हो भने अवको केही समयपछि ५० प्रतिशतभन्दा बढी डिलर बन्द हुने अवस्थामा पुग्ने मेरो अनुमान छ । अवस्था झनै विग्रन सक्ने भन्दै हामीले उहाँहरुलाई खर्च कटौती गर्न सल्लाह समेत दिन थालेका छौ ।

स्वदेशमै एसेम्बल प्लान्ट लगाउने र नयाँ मोडल ल्याउने विषयमा कम्पनीको योजना के छ ?
अहिलेकै अवस्थामा त हामीले त्यस्तो कुनै नयाँ योजना बनाएका छैनौ । जहाँसम्म एसेम्बल प्लान्टको कुरा छ हामीले यसमा एक तहको तयारी गरेर वसेका छौ । उपयुक्त समय आउनासाथ यसमा जान सकिन्छ । तर अहिलेकै अवस्थामा त्यतातर्फ सोच्न सकिने अवस्था छैन । नयाँ मोडललाई नेपाल ल्याउने विषयमा पनि हामी पर्ख र हेरको अवस्थामै छौ ।