इलेक्ट्रिक कार खरिदका लागि उत्कृष्ट तीन देश, नगद छुटदेखी चार्जिङ पूर्वाधारसम्मको सुविधा

अहिले विश्वका अधिकांश राष्ट्रहरुले आफ्ना नागरिकलाई इलेक्ट्रिक भेइकल खरिदका लागि आह्वान गरिरहेका छन् । वातावरणमैत्री विशेषता भएको यस्ता सवारीसाधनको प्रवद्र्धन गर्न हरेक राष्ट्रले आफ्नो क्षमता अनुसार सहुलियत र छुटको व्यवस्था समेत मिलाएका छन् । जसका कारण यस्ता सवारीसाधनको माग विश्व बजारमा वृद्धि भैरहेको छ ।

नेपालको सन्दर्भमा भन्नुपर्दा यहाँको सरकारले इलेक्ट्रिक कारमा जडित मोटर क्षमताको आधारमा भन्सार र अन्तशूल्कमा छुट उपलब्ध गराइरहेको छ । कम्वस्चन इन्जिनयुक्त सवारीसाधनमा २५० प्रतिशतसम्म कर लगाउँदै आइरहेको सरकारले १०० किलोवाट क्षमताको मोटर जडित इभीमा भने जम्मा १५ प्रतिशत भन्सार र १३ प्रतिशत भ्याट लाग्ने व्यवस्था मिलाएको छ । नगद सहुलियतको व्यवस्था मिलाउन नसकेपनि करमा छुट दिइएका कारण कम्वस्चन इन्जिन जडित कारको तुलनामा इलेक्ट्रिक कार निकै सस्तो पर्न गएको छ ।

इलेक्ट्रिक कारको प्रवद्र्धन गर्ने मामलमा युरोप र अमेरिका निकै अगाडी रहेको देखिन्छ । यी राष्ट्रले उपलब्ध गराउँदै आएको नगद सहुलियत र चार्जिङ पूर्वाधारको विकासका कारण पछिल्लो समय इलेक्ट्रिक कारमा रुची राख्ने ग्राहकको संख्या ह्वात्तै बढेर गएको छ । यी मुलुकका तीन राष्ट्र नर्वे, अमेरिका र नेदरल्याण्ड इभी पारखीका लागी उत्कृष्ट बजारका रुपमा स्थापित भएका छन् ।

नर्वे
नर्वेलाई इभी खरिदको हिसावले विश्वकै सर्वाधिक बजार मानिन्छ । यहाँ सन् १९९० देखीनै इभीको प्रवद्र्धन गर्ने निती लागु गरिएको थियो । यो देशका नागरिकले इलेक्ट्रिक कार खरिद गर्दा भ्याट वापत भुक्तानी गर्नुपर्ने २५ प्रतिशत कर मिनाहा पाउँदै आइरहेका छन् । यसको अतिरिक्त कार्वनडाईअक्साइड ट्याक्सका रुपमा तिर्नुपर्ने रकमलाई समेत ग्राहकले भुक्तानी गर्नु पर्दैन । जसका कारण नर्वेमा इलेक्ट्रिक कारको प्रयोग हरेक वर्ष बृद्धि भैरहेको छ । करमा छुटको साथै यहाँ विश्वकै उत्कृष्ट चार्जिङ पूर्वाधार समेत विकास गरिएको छ ।

अमेरिका
विश्वको सवैभन्दा ठूलो अर्थतन्त्र भएको देश अमेरिकामा नयाँ इभी खरिद गर्न इच्छुक ग्राहकलाई ७ हजार ५ सय डलर सम्मको क्रेडिट सुविधा उपलब्ध छ । यसको अतिरिक्त विभिन्न स्टेटहरुले नगद छुट र सहुलियत समेत प्रदान गर्दै आइरहेका छन् । अमेरिकाले सेकेन्ड ह्यान्ड इभी खरिद गर्न चाहने ग्राहकले समेत ४ हजार डलरसम्मको क्रेडिट सुविधा दिँदै आइरहेको छ । यसरी राज्यबाटै क्रेडिट सुविधा पाउने भएपछि ग्राहकले समेत रुचीका साथ इभीको प्रयोगलाई वढवा दिइरहेका छन् । यी सुविधा वाहेक चार्जिङ पूर्वाधारको विस्तारलाई समेत राज्यले उत्तिकै जोड दिइरहेको छ । अमेरिका विश्व प्रख्यात इभी व्रान्ड टेस्लाको उद्गमस्थल समेत हो ।

नेदरल्याण्ड
नर्वे र अमेरिकापछि नेदरल्यण्डका ग्राहकले इभीको खरिदमा सवैभन्दा वढी सुविधा पाइरहेका छन् । यहाँ हरेक नयाँ इभी खरिदकर्ताले सहुलियत वापत ३ हजार ५ सय पाउन्ड पाउने गरेका छन् । यो सहुलियत सेकेन्ड ह्यान्ड इभी खरिदकर्तालाई समेत उपलब्ध रहँदै आएको छ । सेकेन्ड ह्यान्डको हकमा भने २ हजार पाउन्ड सहुलियत दिइन्छ । नगद सहुलियत वाहेक यहाँ विश्वले नै अनुकरण गर्न लायक चार्जिङ पूर्वाधार रहेको छ । देशभर ९० हजार हाराहारी चार्जिङ पूर्वाधार रहको जनाइएको छ ।