सर्भिस सेन्टर संचालनमा ल्याउँदै सिजी मोटर्स, छिट्टै २४ स्थानमा चार्जिङ स्टेशन निर्माण हुने

अवको केही हप्ता भित्रै नेटा इलेक्ट्रिक कारको सर्भिस सेन्टर संचालनमा आउने भएको छ । नेपालका लागी आधिकारिक वितरक सिजी मोटर्सले लतितपुरको खुमलटारमा स्टेट अफ दि आर्ट सर्भिस सेन्टर निर्माण भैरहेको र गाडी डेलिभरी हुँदासम्म सो सर्भिस सेन्टर संचालनमा आइसकने जानकारी गराएको छ । यो सर्भिस सेन्टर आधुनिक, सुविधासम्पन्न र पूर्णत इभी डेडिकेटेड हुने कम्पनीका सिइओ हेमन्त अग्रवालले बताए ।

उनका अनुसार सर्भिस सेन्टरबाट ग्राहकलाई छिटोछरितो र प्रभावकारी सेवा प्रदान गर्न दक्ष तथा अनुवभी टेक्निसियन सहितको टिम खडा गरिएको छ । ‘हामी ग्राहकलाई उत्कृष्ट हस्पिटालिटी सहितको सेवा दिन तयार छौ । अवको ४ महिनाभित्र देशका ६ वटै महानगरपालिकामा डिलर नेटवर्क बिस्तार गरिसक्ने र ती डिलरमा समेत सर्भिस सेन्टरको प्रवन्ध मिलाउने गरी काम गरिरहेका छौ’ उनले नेपाल अटोसंग भने ।

सर्भिस सेन्टरसंगै कम्पनीले देशैभर चार्जिङ स्टेशन निर्माण गर्ने योजना बनाएको छ । सिइओ अग्रवालका अनुसार समय तालिका नै वनाएर चार्जिङ पूर्वाधारलाई देशव्यापी बनाउन लागिएको हो । उनले भने, ‘अवको ४ महिनाभित्र ६ वटा महानगर पालिका र ६ महिनाभित्र १२ वटै उपमहानगरपालिका सहित अन्य ठूला सहरहरुमा गरी कुल २४ भन्दा बढी स्थानमा हाम्रो चार्जिङ पूर्वाधार निर्माण भैसक्नेछ । यसैगरी क्रमिक रुपमा हाइवेमा समेत यस्तो पूर्वाधार निर्माण गर्नेछौ ।’

हाइवेको हकमा हरेक १ सय किलोमिटरको दूरीमा एउटा चार्जिङ स्टेशन राखिने उनको भनाई छ । विक्रीमा मात्र केन्द्रित नभई बिक्री पछिको सेवा र चार्जिङ पूर्वाधारमा कम्पनीले नयाँ आयम ल्याउन चाहेको बताउँदै उनले भने, ‘नेपालको इभी बजारलाई माथिल्लो स्तरमा पुर्याउन हामीले सवै प्रकारका प्रयास गर्नेछौ । इभी प्रयोगकर्तालाई आवश्यक पर्ने सवै किसिमका सेवा÷सुविधा उपलब्ध गराउनु हाम्रो प्रमुख उद्देश्य हुनेछ । यसका लागी कम्पनीले चरणवद्ध रुपमा काम थालिसकेको छ ।’