इटालियन ब्रान्ड बेनेलीको २०२१ मा रेकर्ड सेल : टीआरके ५०२ बन्यो बेस्ट सेलिङ

इटालियन मोटरसाइकल ब्रान्ड बेनेलीले सन् २०२० मा सबैभन्दा बढी मोटरसाइकल बिक्री गर्न सफल भएकोमा सन् २०२१ मा त्यो रेकर्डलाई पनि उछिनेर अर्को रेकर्ड कायम गरेको छ । इटालियन मोटरसाइकल पब्लिकेसन मोटो आईटीका अनुसार २०२० को तुलनामा २०२१ मा यो ब्रान्डका मोटरसाइकल ५७ प्रतिशत बढी बिक्री भएको छ ।

ती मध्ये पनि बेनेली टीआरके ५०२ इटालीकै बेस्ट सेलिङ बाइक बन्न सफल भएको छ । यो वर्ष सो बाइक ६ हजार ५४३ युनिट बिक्री भएको छ । टप १५ बेस्ट सेलिङ बाइकमा यसको नियो–रेट्रो रोडस्टर लियोन्सिनो ५०० र बिगिनर फ्रेन्ड्ली नेकेड स्ट्रिट फाइटर बीएन १२५ संलग्न रहेका छन् ।

बेनेली इटालीका सेल्स म्यानेजर गियानी मोनिनीले बेनेलीले आगामी दिनमा नयाँ रेन्जको रुपमा लियोन्सिनो १२५, लियोन्सिनो ८००, लियोन्सिनो ८०० ट्रेल र टीआरके ८०० जस्ता मोडल उपलब्ध गराउने र ग्राहक सन्तुष्टिमा अझै वृद्धि गर्ने योजना भएको बताए ।

नेपाली बजारमा पनि बेनेलीका मोटरसाइकल र स्कुटर उपलब्ध छन् । नेपाली बजारमा केटीएम इन्टरनेसनल ट्रेडिङले बेनेलीका विभिन्न रेन्जका मोटरसाइकलका साथै हालै प्यानेरिया १२५ स्कुटर बिक्रीका लागि उपलब्ध गराएको छ ।

टीआरके ५०२ बेनेलीको पहिलो एड्भेन्चर बाइक हो । यसमा ५०० सीसी क्षमताको इन्जिन छ र यसले ४७ एचपी पावर दिन्छ ।

यसमा ६ गियर छन् । एड्भेन्चर बाइकमा राम्रो ग्राउन्ड क्लियरेन्स र ठूलो क्षमताको फ्यूल ट्यांक हुनु जरुरी छ । यही कुरालाई ध्यानमा राख्दै टीआरके ५०२ मा २३० एमएमको उच्च ग्राउन्ड क्लियरेन्स दिइएको छ । र, यसको फ्युल ट्यांकको क्षमता २० लिटरको रहेको छ ।

बेनेली टीआरके ५०२ मोटरसाइकल नेपाली सडकमा पनि गुडिरहेका छन् । हाल यो मोटरसाइकल नेपालमा बिक्रीका लागि उपलब्ध छैन । यद्यपि ग्राहकको अर्डर अनुसार यसलाई भित्र्याउन सकिने कम्पनी स्रोतको भनाइ छ । यसको मूल्य करिव १७ लाख रुपैयाँ जति पर्ने अनुमान गर्न सकिन्छ ।