ट्राफिक कारवाहीमा परेर कागजपत्र खोसियो ? कहाँ छ भनेर जानकारी लिन यसो गर्नुस्

तपाई ट्राफिक कारवाहीमा पर्नुभयो र सडकमा कार्यरत ट्राफिक प्रहरीले लाइसेन्स, ब्लुबुक वा यस्तै कागजपत्र लिएर गएका छन् भने ती कागजपत्र कहाँ छन् भनेर सहज तरिकाले थाहा पाउन सकिने व्यवस्था छ ।

यसो भएमा सम्बन्धित कार्यालयमा पुगेर आफ्नो कागजपत्र लिन सहज हुन्छ । महानगरीय ट्राफिक प्रहरी कार्यालयले यसका लागि डकुमेन्ट ट्रयाकिङ प्रणाली (डीटीएस) को विकास गरेको छ ।

हाल काठमाडौं, ललितपुर र भक्तपुर जिल्लामा ट्राफिक कारवाहीमा यसरी खिचिएका कागजात कुन कार्यालयमा छ भनेर थाहा पाउन सकिने छ । यसका लािग मोबाइलको म्यासेज बक्समा गएर ‘echalan’ टाइप गरी एक स्पेस छोडेर आर्थिक वर्ष र चिट नम्बर उल्लेख गरी ३४००१ मा पठाउन सकिन्छ ।

केही समयपछि आफ्नो कागजपत्र कुन ट्राफिक प्रहरी कार्यालयमा छ भन्ने कुराको जानकारी एसएमएस मार्फत नै प्राप्त हुनेछ । महानगरीय ट्राफिक प्रहरी महाशाखाका अनुसार चिट काटिएको केही समयपछि मात्र डीटीएस सक्रिय हुनेछ ।