नयाँ सब–४ मिटर एसयूभी बजारमा ल्याउने योजना बनाउदै स्कोडा

स्कोडा अटो इन्डियाले भारतीय बजारको लागि नयाँ सब–४ मिटर एसयूभीका लागि कार्य गरिरहेको छ । स्कोडा कम्पनी कम्प्याक्ट एसयूभी सेगमेन्टमा प्रवेश गर्ने सम्भावना रहेको छ । सो जानकारी स्कोडा अटोका बोर्ड अध्यक्ष थोमस शेफरले अटोकार इन्डियालाई दिएको उल्लेख गर्दै समाचार सार्वजनिक भएका छन् ।

स्कोडाले हालै फक्सवागन समूह भित्रको एमक्युबी एओ प्लेटफर्मको विकास गर्ने जिम्मा लिएको छ । सो प्लेटफर्म भारत, दक्षिण अमेरिका र दक्षिण अफ्रिका आदिमा प्रयोग गरिन्छ । यस प्लेटफर्ममा स्कोडा कुशाक र स्लाभियाका साथै फक्सवागन टाइगुन समेत विकास गरिएको छ ।

स्कोडाले सब ४ मिटर कार बजारमा ल्याउने सम्भाव्यतामा सक्रिय रूपमा अध्ययन गरिरहेको संकेत दिएको छ । स्कोडाका वरिष्ठ कार्यकारीले सब ४ मिटर सुरु गर्ने निर्णय एक बलियो बिजनेसमा निर्भर हुनेमा जोड दिएका छन् ।

स्कोडा अटो इन्डियाले यो वर्षको सुरुमा नयाँ स्कोडा कुशाक मिड साइज एसयूभी सार्वजनिक गरेको छ । कम्पनीले भारतमा यो २.० प्रोजेक्ट अन्तर्गत लन्च गरेको हो । कम्पनीले नयाँ सेडान स्कोडा स्लाभिया समेत लन्च गर्ने तयारी गरिरहेको छ ।