महिन्द्रा एक्सयूभी ७०० ले पायो फाइभ स्टार सेफ्टी रेटिङ, भित्रिदै नेपाल

महिन्द्राले हालै भारतीय बजारमा उपलब्ध गराएको महिन्द्रा एक्सयूभी ७०० को बेस भेरिएन्ट एमएक्सले ग्लोबल एनक्याप क्र्यास टेस्टमा फाइभ स्टार प्राप्त गरेको छ ।

ग्लोबल न्युकार एसेसमेन्ट प्रोग्राम (जीएनक्याप) ले हालै गरेको क्र्यास टेस्टमा सो कारले एडल्ट सेफ्टीका लागि ५ स्टार र चाइल्ड सेफ्टीका लागि ४ स्टार रेटिङ प्राप्त गरेको हो । यो सँगै महिन्द्रा एक्सयूभी ७०० सबैभन्दा सुरक्षित कार मध्ये एक बनेको छ ।

हालै गरिएको एमएक्स भेरिएन्टमा ड्युअल एयरब्याग, एबीएस, ईबीडी, आइएसओफिक्स आदि फिचर उपलब्ध छन् । यसको हाइयर भेरिएन्टमा ईएससी, टीसीएस, एचएलए तथा एडेप्टिभ क्रुज कन्ट्रोल, लेन किपिङ असिस्ट र अटोनोमस इमर्जेन्सी ब्रेकिङ जस्ता फिचर उपलब्ध छन् । अन्य भेरिएन्टले पनि भविष्यमा यस्तै सुरक्षा रेटिङ पाउने अपेक्षा गरिएको छ ।

५ र ७ सिट क्षमतामा आएको महिन्द्रा एक्सयूभी ७०० मा २.२ लिटरको टर्बो डिजेल इन्जिन र २.० लिटर टर्बोचार्ज्ड पेट्रोल इन्जिन उपलब्ध हुनेछ । डिजेल इन्जिनले लगभग १८५ बीएचपी पावर र पेट्रोल इन्जिनले २०० बीएचपी पावर जेनेरेट गर्नेछ ।

नेपाली बजारमा पनि यो एसयूभी सके सम्म छिट्टै नै उपलब्ध गराउने तयारीका साथ कार्य भइरहेको बताइएको छ ।